څو کاله واړندې ملي بسونو د هرات ښاریان له یو ځای بل ځای ته د ۵ افغانیو په بدل کې لېږدول ، خو اوس هغه ملي بس موټر له کاره لوېدلي او د ښار په یوه څنډه کې درول شوي دي.
د ښار اوسېدونکي د ملي بسونو بېرته فعالولو هیله لري او وايي، د کمزوري اقتصاد له مله نه شي کولی په ټکسي موټرونو کې تګ راتګ وکړي.
د هرات ښار یوتن اوسېدونکی محمد ابراهیم وايي: «دا واقعیت دی چې د خلکو اقتصاد کمزوی دی، د کرایې او لګښتونو وس نه لري. د ملي بس ښه والی دا دی چې لګښت یې کم دی او په لږ وخت کې خلک خپلو کارونو ته رسوي.»
د حسیب الله په نوم د هرات یو بل اوسېدونکی وايي: « د ملي بسونو بیا ځل فعالېدل د خلکو د اقتصادي وضعیت لپاره ډېر ګټور دي، ځکه د خلکو اقتصادي وضعیت اوسمهال کمزوی دی. دا یو ښه سهولت دی او د کرایې ارزانه کېدو لپاره باید ترې ګټه واخیستل شي.»
هرات ښاریان د ملي بسونو ښېګڼې یادوي او وايي، ملي بسونه نه یوازې په اقتصادي لحاظ ګټور و، بلکې د ښار ګڼه ګوڼه هم ورسره کمه وه چې له امله ښاریانو خپلو کارونو ته پر وخت رسېدنه کولی شوه.
د هرات ښار یو تن اوسېدونکی شریف الله په دې اړه وايي: «د دې لپاره چې موټر ډېر زیات شوي، که ملي بس وي، د موټرو بیروبار به ورسره کم شي. له اقتصادي پلوه هم ښه دی، خلک وس نه لري چې ۲۰ یا ۳۰ افغانۍ کرایه ورکړي، خو د ملي بس لګښتونه یو څه کم دي.»
د هرات ښار یو بل اوسېدونکی بسم الله هم ورته نظر لري او وايي: «دا ښه دی چې ګڼه ګوڼه کمه شي او خلکو ته سهولتونه رامنځته شي؛ دا یوه لویه وسیله ده او ډېر کسان انتقالولی شي.»
بله خوا، د هرات ځایي مسوولین وایي د تېلو بیې لوړېدو، د ملي بسونو له کار غورځېدو او ښاري ګڼه ګوڼې زیاتوالي له امله د ښاري بسونو فعالیت درېدلی او په خبره یې هڅه کوي چې د تګ راتګ په برخه کې اوسېدونکو ته د اسانتیاوو رامنځته کولو په موخه یاد بسونه بېرته ترممیم او په ښار کې یې فعالیت پیل کړي.
د هرات ملي بسونو تصدۍ آمر عصمت الله وردګ وايي: «موږ دا مهال د یو شمېر بسونو د ترمیم په حال کې یو او غواړو د ښار په داخل کې یې فعاله کړو. همدارنګه پلان لرو چې یو شمېر نوي کاسټر موټرونه هم له مرکز دلته راوړو ترڅو په ښار کې فعال او خلکو ته خدمت وکړي.»
هرات کې اوس مهال لس ملي بسونه فعال دي چې د دغه ولایت پنځو ولسوالیو او بادغیس ولایت ته مسافر لېږدوي.
