کندوز ولایت چې د کرنې په برخه کې ښه مخینه لري له غنمو، وريجو، خټکیو او هېندواڼو وروسته په کې انګور ښه حاصلات ورکوي.
که څه هم روان کال په کندوز کې د انګورو حاصلات زيات شوي، خو بڼوال يې شکايت کوي چې د بازار نه شتوالي له امله پر تاکونو لګول شوی لګښت نه شي پوره کولی.
دوی له سرپرست حکومته غواړي چې په کور دننه او بهر انګورو ته د پلور بازار له پيدا کولو سربېره، د تازه مېوې ساتنې لپاره سړې خونې جوړې کړي.
د انګورو یو تن بڼوال وايي: « زه۱۰ جریبه باغ لرم او ۱۰ ډوله انګور په کې دي. دلته محلي بازارونه ډېر ساړه دي او کله چې مېوه ورسېږي، د سالنګ لاره بنده شي. زموږ انګور په اوسنۍ بیه خپل لګښت نه پوره کوي؛ سره او درمل ګران دي او سړې خونې نه شته چې په کې ویې ساتو.»
په همدې تړاو یو تن بل بڼوال وايي: « سږ کال په کندوز کې ډېر ښه انګور شوي خو بازار نه لري. په دې قېمتونو سره بڼوال نه شي کولی خپلې مصرف کړې پیسې ترلاسه کړي. له دولت غوښتنه کوو چې د انګورو ساتنې لپاره سړې خونې جوړې کړي.»
که څه هم ځايي چارواکي مني چې سږکال کندوز کې د انګورو حاصلات۹۰ سنله زيات شوي؛ خو زياتوي چې دغه زياتوالی برګزانو ته د دوی له خوا ورکړل شوي پوهاوي پایله ده.
د کندوز کرنې ریاست مرستیال عبدالغفار صدیقي وايي:« په کندوز کې د انګورو حاصلات ۹۰ سلنه زیات شوي. د دې زیاتوالي لامل بڼوالو ته د درملو او عامه پوهاي ورکړه ده. همدارنګه د موسساتو په همکارۍ چیله يي سیسټم هم د انګورو په حاصلاتو کې د زیاتوالي یو لامل دی.»
بله خوا، سوداګر د بزګرانو شکايتونو ته په پام وايي، هڅه کوي چې د بزګرانو د ګټې زياتوالي لپاره کورنۍ مېوې نړيوالو بازارتونو ته ورسوي.
د کندوز د صنعت او سوداګرۍ خونې مرستيال حاجي بصیر بهیج وايي: « په کندوز کې روان کال د انګورو حاصلات ډېر ښه دي. که دولت او د سوداګرۍ خونه همغږي وکړي، د ولایتونو ترڅنګ به یې بهرنیو هېوادونو ته هم صادر کړو، ترڅو بزګران ښه ګټه ترلاسه کړي او وهڅول شي.»
په کندوز ولایت کې له غلو دانو سربېره خټکي، هندواڼې، شفتالو، زرد آلو، ناک، نارنج، لیمو، بادام، پسته، املوک او نورې مېوې ترلاسه کېږي؛ خو بهر ته د صادراتو پر وړاندې یې ستونزې شته او په کوردننه بازار دومره ظرفیت نه لري چې دغه مېوې په کې وپلورل شي.
