د مسکو فارمټ ۶مې ناستې په پای کې ګډې خپرې شوې خبرپاڼه کې په افغانستان کې د ترهګرۍ په اړه د اندېښنو له منځه وړلو او د ترهګرۍ پر وړاندې د مبارزې لپاره پرګډې همکارۍ، ټول ګډونه حکومت جوړولو او د نجونو، ښځو او لږکیو د حقونو پر خوندي کولو ټینګار شوی.
د مسکو فارمټ غونډې ګډونوالو له سرپرست حکومت غوښتي، له ژمنو سره سم په افغانستان کې د ترهګرۍ پر وړاندې د تایید وړ ګامونه پورته کړي.
د ګډون کوونکو هېوادونو استازو د خپلواک، باثباته او سوله ییز افغانستان د ملاتړ ترڅنګ د درېیم هېواد له لوري په افغانستان او ګاونډ کې د پوځي مرکزونو جوړېدو احتمال غندلی او دغه ګام یې نه مننونکې هڅه بللې.
د ګډې خبرپاڼې یوه برخه: « د افغانستان سرپرست حکومت دې له نړۍ سره کړیو ژمنو او اړتیاوو سره سم، د ترهګرۍ پر وړاندې د لېدو او تایید وړ مبارزه وکړي. ګډونوال هېوادونه د خپلواک، باثباته او سوله ییز افغانستان غوښتونکي دي او په دغه هېواد یا ګاونډیو هېوادونو کې د درېیم هېواد له لوري د پوځي مرکزونو جوړولو هڅې ورته د منلو نه دي.»
همداراز، په دې خبرپاڼه کې د برخوالو هېوادونو استازو د لږکیو، ښځو او نجونو د حقونو ورکولو ترڅنګ په افغانستان کې د ټولګډونه حکومت جوړېدو غوښتنه هم کړې.
د خبرپاڼې په یوه برخه کې له افغانستان سره پر ګډو همکاریو له ټینګار سربېره، له نړیوالې ټولنې غوښتل شوي چې له افغانانو سره بېړنیو بشري مرستو ته دوام ورکړي او له دغو مرستو سیاسي ګټه وانه خلي.
د ګډې خبرپاڼې یوه برخه: « په داسې حال کې چې له افغانستان سره کېدونکې بشري مرستې د یو شمېر هېوادونو له لوري سیاسي کېدو خوا ته روانې شوې، د مسکو فارمټ هېوادونه تمه لري چې سرپرست حکومت په افغانستان کې یو ټول شموله، معقول او عصري حکومت رامنځته کړي، د لږکیو، ښځو او نجونو بنسټیز حقونه خوندي او د افغانانو غوښتنې ومني. همدارنګه نړیواله ټولنه دې هم له افغانانو سره بېړنيو بشري مرستو ته دوام ورکړي.»
سرپرست حکومت د مسکو فارمټ شپږمې ناستې په اړه زموږ اړیکو ته ځواب را نه کړ او نه یې تراوسه ګډې خبرپاڼې ته رسمي غبرګون ښودلی.
بله خوا د سیاسي چارو کارپوهان د مسکو فارمټ غړي هېوادونو د افغانستان په قضیو کې ښکېل بولي او زياتوي چې د تېر پرتله يې د افغانستان په اړه په ليدلوري کې نرمښت موجود و او له همدې کبله يې له سرپرست حکومت سره د يو لړ غوښتنو په مقابل کې د همکاريو مشروطې ژمنې کړې دي.
د سیاسي چارو کارپوه عزیز معارج وايي: « د مسکو فارمټ ګډون لرونکو هېوادونو پرېکړه لیک یا اعلامیه ډېره ګټوره او مؤثره ده، ځکه چې نه یوازې له اسلامي امارت د ټولګډونه حکومت، ترهګرۍ ضد مبارزې او حقونو د ورکړې غوښتنه شوې بلکې د خپلو مرستو او همکاریو ژمنه یې هم کړې. دا د دوه اړخیز جوړجاړي مانا لري او دا یوه ښه پرېکړه کړه.»
د مسکو فارمټ په خپره کړې خبرپاڼه کې له افغانستان سره د اقتصادي همکاریو او په سیمه يیز اتصال کې د دې هېواد ونډه مهمه یاده شوې.
د مسکو فارمټ شپږمه ناسته کې د چین، هند، ایران، قزاقستان، قرغيزستان، تاجکستان، پاکستان، روسیې او ازبېکستان استازو ګډون درلود.
