د سوداګرۍ او پانګونې خونه یو ځل بیا په نږدې راتلونکي کې د امام ابوحنیفه درېیم ملي او نړیوال نندارتون جوړېدو خبر ورکړی.
د دغې خونې مسوولین وایي، د افغاني تولیداتو د ودې او غوړېدو په موخه یې هوډ کړی چې دغه نندارتون په کابل کې پرانيزي.
د دوی په خبره، په دې نندارتون کې به د افغان صنعت کارانو ترڅنګ د سیمې او ګاونډیو هېوادونو صنعتکاران هم ونډه ولري.
دوی زیاتوي، د امام ابو حنیفه په درېیم نندارتون کې به ۷۰۰ غرفې کېښودل شي چې ۴۰۰ به یې کورنیو او پاتې نورې بهرنیو شرکتونو ته ځانګړې وي.
د سوداګرۍ او پانګونې خونې ریيس یونس مومند وايي: « هڅه به وشي چې دغه نندارتون د افغانستان د خلکو لپاره یو اقتصادي پرمختګ رامنځته کړي. په دې نندارتون کې به ۷۰۰ غرفې وي چې ۳۰۰ به یې بهرنیو او ۴۰۰ کورنیو تولیداتونو ته ځانګړې شي.»
مومند همدارنګه وایي، هڅه کوي، په هېواد کې د صنعتي نندارتونونو له لارې سیمې او نړۍ سره اړېکې ټینګې کړي.
د مومند په خبره، د صنعتي نندارتونونو له لارې به افغاني محصولاتو او تولیداتو ته د بازار موندنې، د ملي پانګوالو ملاتړ، د ملي او نړیوالو سوداګرو ترمنځ د اړیکو برابرولو او هېوادوالو ته د کورنیو تولیداتو او محصولاتو د ورپېژندلو هڅه وشي.
هغه په دې اړه وايي: « دغه نندارتون د افغانستان په زړه کابل ښار کې جوړېږي او شپږ ورځې به دوام کوي. د دې نندارتون موخه په کور دننه او نړۍ ته د افغانستان د تولیداتو معرفي کول دي. موږ دغه نندارتون ته له بهر څخه داسې شرکتونه را بللي چې د کارخونو او تولید په برخه کې فعالیت لري. د بېلګې په توګه، د لومړي ځل لپاره به د جاپان هونډا شرکت خپل تولیدات نندارې ته وړاندې کړي.»
په ورته مهال، د ایران د نندارتونونو مسوول بیا ویلي، هڅه کوي له افغانانو سره د صنعت په وده کې اوږه په اوږه وړاندې لاړ شي.
علي رضا صدر زاده په خبرخ، ایراني صنعت کاران لېواله دي چې د افغانستان د کانونو استخراج په برخه کې پانګونه وکړي.
هغه زیاته کړه:« ډېری هغه ایراني شرکتونه چې په دې نندارتون کې به ګډون ولري، صنعت او ټکنالوژي افغانستان ته راوړي. د نندارتون ډېره کوچنۍ برخه محصولاتو ته ځانګړې ده، خو لویه برخه به د افغانستان د کانونو په استخراج او د هغو توکو د تولید په اړه وي چې په افغانستان کې یې د تولید ظرفیت شته.»
ټاکل شوې ده، چې په کابل کې د امام ابوحنیفه درېیم ملي او نړیوال نندارتون د روانې تلې یا میزان میاشتې په ۱۵مه نېټه پیل او تر یوې اوونۍ دوام ولري.
د یادونې ده چې د “امام ابوحنيفه” په نامه د ملي او نړيوالو سوداګريزو توکو لومړی او دویم نندارتون هم تر دې وړاندې په کابل کې جوړ شوي وو.
