پنجشېر او بدخشان دواړه غرني ولایتونه دي او ترمنځ پرتو غرونو کې تېره شوې خامه لاره د کال په ډېره برخه کې په واورو پوښلې وي.
د دغو ولایتونو اوسېدونکي شکایت کوي چې د لارې تنګوالي او خراب والي له امله ستونزو سره مخامخ دي.
د دوی په خبره، د يادې لارې د خاموالي او خرابوالي له کبله د سفر پرمهال له سختو کړاوونو سره مخ کېږي او ډېر کله یې ناروغان روغتونونو ته له رسېدو وړاندې پر لارو ساه ورکوي.
د پنجشېر ولایت یو تن اوسېدونکی شمشېرخان وايي: « کوچني موټر له انجمن کوتل څخه تېرېدو پرمهال له ستونزو سره مخ وي. دغه کوتل سخت او لاره یې خامه ده؛ په دې لاره له هرځل تېرېدو سره د پېښې وېره لرو.»
دغه راز د بدخشان اوسېدونکی همایون غریب یار بیا وايي: « له اسلامي امارت مننه کوو چې دغه لاره جوړوي. موږ په دې لاره له ګڼو ستونزو سره مخامخ یو. د مثال په توګه، موږ نه شو کولی خپل ناروغان او په ځانګړې توګه مېندواره ښځې تر روغتونه پورې ورسوو. ډېر کله ناروغان په لارو کې ساه ورکوي.»
ځايي چارواکي وايي، د پنجشېر او بدخشان ولایتونو ترمنځ د غځېدلې لارې د رغولو چارې دوام لري او ژر به یې ګټې اخیستنې ته وسپاري.
دوی زیاتوي، دا مهال د دغې۲۱۰ کیلو مټره اوږدې لارې د ۶۸ کیلومټرو په اوږدوالي یوه برخه تر کار لاندې ده او ژر به ګټه اخیستنې ته وسپارل شي.
په پنجشېر ولایت کې د دفاع وزارت د انجینرۍ کنډک قوماندن نقیبالله فرقاني وايي: « د دفاع وزارت د چارواکو په امر، د پنجشېر لېوا او د انجنیرۍ کنډک له ماشینرۍ څخه په ګټه اخیستنې، د پنجشېر ولایت له پریان ولسوالۍ څخه کار پیل شوی، انجمن کوتل رغول شوی او ټاکل شوې د بدخشان تر کران او منجان، یمګان، جرم او په پای کې تر بهارک ولسوالۍ پورې لاره جوړه کړو.»
د پنجشېر والي محمد آغا حیم بیا وايي، هڅه کېږي د دغې لارې پر رغولو سربېره د پنجشېر ځایي خلکو ته د کار فرصتونه هم برابر شي او په همدې موخه د یو شمېر کاني زېرمو استخراج پيل شوی دی.
حکیم په دې اړه وايي: « د جي.پي.اېس په وسیله د پنجشېر ولایت ۶۰۰ کانونه اوس مهال ۱ زر او ۷۰۰ ته رسول شوي. په دغو کانونو کې له ۵۰۰ تر ۶۰۰ کانونه همدا اوس فعال دي او پاتې نور دېته چمتو دي چې د افغانستان له هر ځایه تاجران او پانګوال راشي او پر دغو کانونو پانګونه وکړي.»
د بدخشان ولایت ډېری اوسېدونکي دا مهال پلازمېنې کابل ته د تګ راتګ لپاره اوږده مزلونه کوي. دوی اړ دي چې له تخار، کندز، بغلان او پروان ولایتونو تېر شي او کابل ته ورسېږي.
د چارواکو په خبره، د دې لارې په رغېدو سره به د بدخشان د خلکو د تګ راتګ لاره هم لنډه شي.
