د افغانستان سرپرست حکومت په خپل درې کلن مزل کې بریالی شوی چې د سيمې له ګڼو هېوادونو سره غیر رسمي تعامل ولري خو دغه تعامل تر ډېره پر اقتصادي او ټرانزیټي اړیکو متمرکز دی.
په ځينو هېوادونو کې د افغانستان سیاسي استازولۍ کابل ته سپارل شوې او همدا راز ځينې نور هېوادونه او نړیوال سازمانونه په کابل کې سفارتونه او استازولۍ لري.
خو د سیاسي چارو کارپوهان وايي، له دې ټولو سره سره، د نړۍ ستر هېوادونه د افغانستان له سرپرست حکومت سره رسمي اړیکو ټینګولو ته زړه نه ښه کوي.
دوی یې لامل له افغانستان سره د نړۍ عقدوي چلن بولي او وايي، له هغه وروسته چې امریکا او متحدین یې له افغانستانه ووتل، د کابل پر وړاندې یې عقدوي دریځ غوره کړی.
دوی زیاتوي، په کور دننه ځینو سیاستونو هم له نړیوالې ټولنې سره د افغانستان رسمي اړیکو پر ټینګښت اغېز کړی او باید له سره پرې غور وشي.
د سیاسي چارو کارپوه حکمت الله حکمت وايي: « د اسلامي امارت په سیاستونو کې داسې آګاهانه یا غیر آګاهانه پالیسۍ کارول کېږي چې له نړیوالې ټولنې سره د افغانستان د تعامل مخه نیسي.»
همدارنګه ځېنې نور بیا وایي، لوېديځ په دې لټه کې دی چې پر سرپرست حکومت د فشار په راوړلو سره خپلې هغه ګټې خوندي کړي چې د نظامي حضور پرمهال يې په افغانستان کې لرلې.
دوی وايي، سرپرست حکومت باید شته ستونزو ته د حل مناسبې لارې پیدا کړي، ترڅو د رسمیت پېژندنې په برخه کې د نړۍ پلمې ختمې شي.
د سیاسي چارو کارپوه سېد اکبر آغا وايي: « ښه خبره دا ده چې افغانان هغه ستونزې په خپلو کې هوارې کړي چې نړۍ ته بهانې په لاس ورکوي، ترڅو له دغو بهانو ځان خلاص کړو او د هغوی لاسونه ور لنډ کړو.»
د چارو کارپوهان په دې باور دي چې د نړۍ له لوري پر افغانستان د لګېدلو بندیزونو اصلي قرباني عام ولس دی حال دا چې ولس باید د چارواکو او نړۍ د سیاستونه قرباني نه شي.
