د لغمان ولایت شاهي کانال لومړي فاز جوړولو هڅې چې له څو کلونو راهيسې کېدې، پرون یک شنبه (د ۱۴۰۳ کال د وږي پر ۲۵ مه ) رسماً پيل شوې.
د اوبو او انرژۍ وزارت سرپرست مولوي عبدالطیف منصور د کانال جوړولو پرانیست غونډې ته د وینا پر مهال وویل، د دې کانال د لومړي فاز پر لومړۍ برخې رغولو شاوخوا ۸ ميليونه ډالره لګول کېږي.
منصور زیاتوي: «د لومړي فاز لومړۍ برخې لګښت ۸ میلیونه امریکايي ډالره ده، چې د اسلامي امارت له پراختیايي بودیجې ورکول کېږي. د دې برخې په بشپړېدو سره به شاوخوا ۵ زره هکټاره ځمکه خړوبه شي.»
په همدې حال کې د دې وزارت چارواکي وايي، د دغه کانال بشپړېدو سره به د زرګونه هکټاره ځمکې پر خړوبېدو سربېره د ځايي اوسېدونکو په ژوند کې هم مثبت بدلون رامنځته شي.
د اوبو او انرژۍ وزارت سلاکار فاروق اعظم وايي: « دا په داسې یوه ځای کې چې ځمکه کمه او نفوس ډېر وي، یوه لویه پروژه ده. د لغمان خلکو یو یا دوه جریبه ځمکه لرله خو اوس به ۱۰۰ زره جریبه ځمکه ولري.»
له دې سره، د لغمان ځايي چارواکي غوښتنه کوي چې د دې کانال د لومړي فاز له بشپړېدو وروسته دې د کانال پاتې برخې هم جوړې شي، ترڅو په دې ولايت کې اوبه په سمه توګه مديريت شي.
د لغمان والي شېر احمد حقاني وايي: « موږ لغمان ولایت ته د نورې پاملرنې غوښتنه هم کوو او باید د کانال ټولې برخې جوړې شي؛ ترڅو د لغمان خلکو او په ټوله کې د ختیځ اوسېدونکو لپاره اقتصادي پرمختګ رامنځته شي.»
د اوبو او انرژۍ وزارت سرپرست مولوي عبد الطیف منصور وايي: « د کله ګوش بند به هم جوړیږي. کله چې دا بند جوړ شي، په کانال کې به د اوبو فشار زیات شي او تر مهترلام بابا زیارت پورې ټوله پرته ځمکه به خړوبه شي. ډېر ژر به د کله ګوش بند د رغولو تړون له یوه خصوصي شرکت سره لاسلیک شي.»
بله خوا، د لغمان اوسېدونکي خوښ دي چې په سیمه کې یې داسې ستره حیاتي پروژه پلې کېږي.
د دوی په خبره، له دې سره به ډېرو بې روزګاره خلکو ته د کار زمینه هم برابره شي.
د لغمان اوسېدونکی محمد نواب وايي: «د شاهي کانال په جوړېدو سره د لغمان خلکو ته د کار زمینه برابره او دا پرتې دښتې به خړوبې شي او خلکو ته به ډېره ګټه ورسېږي.»
د لغمان بل اوسېدونکی ګلاشېر وايي: «دا ډېر لوی کار دی، خلکو ته کار پیدا کېږي او ځمکې ورسره آبادېږي.»
د اوبو او انرژۍ وزارت د مالوماتو له مخې، د لغمان شاهي کانال چې ټولټال۷۰ کیلو مټره اوږدوالی لري، په دوو فازونو کې جوړېږي.
د وزارت په خبره، پر دغه کانال د دولت له بودیجې ۵۰ میلیونه امریکايي ډالره لګښت راځي چې په بشپړېدو سره به یې ټو ۲۰زره هکټاره ځمکه خړوبه شي.
