د تخنیکي او مسلکي زده کړو ادارې د یکشنبې په ورځ(د ۱۴۰۳ کال د وږي پر ۲۵ مه) د خپلو یو کلنو لاسته راوړنو راپور له رسنیو سره شریک کړ.
د دغې ادارې چارواکو وویل، د ټول هېواد پر کچه زرګونه تنو ته تخنیکي او مسلکي زده کړې ورکړل شوې او زرګونه نور دا مهال د هېواد په ښوونیزو مرکزونو کې په حرفه يي او مسلکي زده کړو بوخت دي.
د دوی په خبره، د اسلامي امارت ۳۵ زره غړیو ته د ادارې او مدیریت په برخه کې دوه کلنې زده کړې ورکول کيږي او دا مهال یې زده کړې روانې دي.
د دغې ادارې سرپرست مولوي غلام حیدر شهامت وايي، په تېر یوه کال کې ۸۰ زره کسان د تخنیکي او مسلکي زده کړو مرکزونو ته جذب شوي او همدا راز په دې موده کې ۱۹ زره کسان له دغو زده کړو فارغ شوي او اوسمهال د کار په مارکېټ کې پر دندو بوخت دي.
شهامت زیاتوي: « دا مهال په پسرلني سمسټر کې ۳۵ زره مجاهدین د ادارې او منجمنټ په برخو کې زده کړې کوي. تېر کال شاوخوا ۸۰ زره زده کوونکي او محصلین د تخنیکي او مسلکي زده کړو مرکزونو ته جذب شوي. همدارنګه، تېر کال ۱۹ زره تنه د تخنیکي او مسلکي زده کړو له مرکزونو فارغ شوي او زموږ مالومات ښيي چې د دغو کسانو ډېره برخه د هېواد په بېلابېلو سکټورونو کې پر دندو بوخت دي.»
د تخنیکي او مسلکي زده کړو ادارې تخنیکي او مسلکي مرستیال غلام سعید احساس وايي:« دغو کسانو ته ۱۸ میاشتې زده کړې ورکول کېږي او دا زده کړې به ډېر لوړ کیفیت ولري. له فراغت وړاندې به له دغو کسانو ازموینه اخیستل کېږي او څوک چې بریالي شي، د لېسې په دوره کې د دولسم ټولګي اسناد او د انستیتیوت په دوره کې د څوارلسم اسناد ورکول کېږي.»
د تخنیکي او مسلکي زده کړو ادارې سرپرست وايي، په لسو برخو کې د تخنیکي او مسلکو زده کړو ۱۱۱ څانګو کې روزنیز خدماتونه وړاندې کوي.
د شهامت په خبره، د هېواد په ۳۴ ولایتونو کې د بېلابېلو تخنیکي او مسلکي زده کړو۳۷۵ فعال مرکزونه لري او زرګونه تنه په کې پر زده کړو بوخت دي.
هغه زیاتوي: « دا مهال د تخنیکي او مسلکي زده کړو اداره د هېواد په ۳۴ ولایتونو او ۲۵۴ څخه زیاتو ولسوالیو کې ښوونیز مرکزونه لري چې ټولیز شمېر یې ۳۷۵ مرکزونو ته رسېږي. په دغو زده کړو کې ۱۰ سکټورونه او ۱۱۱ ښوونیزې څانګې شاملې دي.»
چارواکو د تخنیکي او مسلکي زده کړو ادارې د فعالیتونو اصلي موخه د کار بازار ته د مسلکي او حرفوي بشري ځواک وړاندې کول وګڼل او کتوونکي وايي، په مسلکي او حرفه يي بڼه د کارکوونکو روزنه د اقتصادي پیاوړتیا لامل کېدای شي او دا د افغانستان د ځان بسیاینې پر لور ګام دی.
