له هغې وروسته چې د اسلامي امارت د افغانستان لپاره د ملګرو ملتونو بشري حقونو ځانګړي راپور ورکوونکي پر ریچارد بېنېت دې هېواد د سفر بندیز ولګاوه، نوموړي له بهر مېشتو افغانانو سره لیدنې ډېرې کړې دي.
بېنېت وايي، په قطر او ترکیه یې له افغان سیاسي څېرو او ښځینه فعالانو سره لېدنې او خبرې ګټورې وې.
هغه زیاته کړې: « له یو شمېر افغان ښځينه فعالانو، ډیپلوماټانو، سیاسي څېرو او کارپوهانو سره مې د افغانستان د روان بشري وضعیت په اړه د ترکیې په انقره، استانبول او د قطر په دوحه کې ګټورې لېدنې پای ته ورسولې او له دې وروسته به د بشري حقونو سازمان د راتلونکي ناستې په تړاو چې ټاکل شوې دوشنبې په ورځ ترسره شي، منتظر پاتې شم.»
بېنېت په داسې حل کې له بهر مېشتو افغانانو سره ګوري چې ټاکل شوې راتلونکې دوشنبه د ملګرو ملتونو سازمان د افغانستان ښځو او روان بشري وضعیت په اړه ناسته ولري.
بله خوا، د سیاسي چارو څارونکي له هېواده بهر د افغانستان په اړه ناستې ګټورې نه بولي او وایي، که نړیوال غواړي ناستې او لېدنې یې پر افغانانو مخامخ اغیزې ولري، نو اړتیا ده چې په کوردننه له افغانانو سره مخامخ خبرې او ناستې وکړي.
د سیاسي چارو کارپوه حکمت الله حکمت وايي: « زموږ افغانانو باور دا دی، که زموږ د خلکو د بشري حقونو په اړه خبرې کېږي، نو باید د افغانستان په داخل کې له افغانانو سره واقعیتونوته په کتو وشي؛ خو داسې ښکاري چې ملګري ملتونه د غربي نړۍ او په ځانګړې توګه امریکا د لاس آله ده چې د بشریت پر وړاندې ترې کار اخلي. له ملګرو ملتونو سره زموږ کار کوونکي افغانان باید د خپل ولس په اړه غلط راپور ورنه کړي او په بهرنیو هېوادونو کې د بشري حقونو نارې ونه وهي.»
ځېنې نور هم له نړیوالو غواړي چې د افغانانو د بشري وضعیت په اړه نه یوازې په کوردننه بلکې له کوره بهر هم پوښتنې وکړي.
د دوی په خبره، دا مهال ګڼ شمېر افغان وګړي له هېواده بهر مېشت دي او هلته یې اساسي او بشري حقونه تر پښو لاندې کیږي.
د سیاسي چارو کارپوه ادریس محمدي ځاځی وايي:« داسې نه ده چې زموږ بهر مېشتي افغانان هلته هېڅ ستونزې نه لري. همدا اوس ایران، پاکستان، ترکیې او نورو هېوادونو کې افغانان ځورېږي خو ملګري ملتونه څه نه وايي. له افغاستان سره له تعلق پرته د ملګرو ملتونو راپورونه هېڅ ګټه نه لري او نه کوم ځای نیسي.»
د ملګرو ملتونو د بشري حقونو څانګې د سیپټمبر پر درېیمې نېټې په افغانستان کې د روان بشري وضعیت په اړه راپور خپور کړ او اټکل کېږي چې د بشري حقونو په ۵۷ ناسته کې به وڅېړل شي.
په یاد راپور کې د افغان نجونو او ښځو د کار او زده کړو او همدارنګه د افغانانو په روان بشري وضعیت اندېښنه ښودل شوې وه.
