که څه هم افغانستان ته د نړیوالې ټولنې مرستې دوام لري، خو له دې سره سره لا هم د خلکو د بېکارۍ او بېوزلۍ کچه ورځ تر بلې په لوړېدو ده.
د ملګرو ملتونو د بشري مرستو د همغږۍ ادارې (اوچا) په خپل تازه راپور کې ویلي، په افغانستان کې ۸۰ سلنه کورنیو هر غړی له یوه امریکایي ډالر څخه کم عاید لري او ادعا کوي چې د بشري مرستو بهیر کې يې لاسوهنې شته او په دې مورد یې ۱۰۶ پېښې ثبت کړي دي.
راپور کې راغلي، د سرپرست حکومت یو شمېر چارواکي د بشري مرستو په بهیر کې لاسوهنه کوي او په تېر یوه کال کې یې د لاسوهنو۱۰۶ پېښې ثبت کړې دي.
د راپور یوه برخه: « په افغانستان کې بېوزلۍ له هر دوو افغانانو یو یې اغېزمن کړی، د ۸۰ سلنه کورنیو هر غړی په ورځ کې یو امریکایي ډالرو څخه کم لګښت سره ژوند کوي. په افغانستان کې د خلکو ژوند ژغورلو لپاره لا ډېرو مرستو ته اړتیا ده.»
که څه هم اسلامي امارت د اوچا وروستي راپور په اړه څه نه دي ویلي ، خو د سیاسي چارو شنونکي په دې باور دي چې افغانان د نړیوالو له لوري د دوی د اهدافو قرباني شوي او د مرستو په وېش کې د لاسوهنې په تړاو خپله نړیوال ښکېل دي.
د سیاسي چارو شنوونکی خلیل احمد نادم وايي: « له افغانستان سره د ملګرو ملتونو او موسسو بشري مرستې خپله د نړیوالو له خوا وېشل کېږي. زه فکر نه کوم د اسلامي امارت چارواکي په دې کې ښکېل وي.»
د سیاسي چارو شنوونکی توریالی ځاځی هم وايي: « افغان ولس باید په دې پوه شي چې دوی د اوسني حکومت په راوستلو د نړیوالو د سیاسي اهدافو ښکار شوي. ملګري ملتونه اوس هغه نه دي چې پ۵۰ کاله پخوا و؛ پر اسلامي امارت د دوی نیوکې یو ډول سیاسي فشار دی.»
له دې سره، د نظر ځینې خاوندان دا د سرپرست حکومت دنده ګڼي چې په افغانستان کې د نړیوالو بشري مرستو د هڅونې په موخه، د نړیوالو مرستندویه بنسټونو امنیت ټینګ کړي.
د اقتصادي چارو شنونکی سمندر سیلاب وايي: « د افغانستان بحراني سیاسي او اقتصادي وضعیت ته په کتو، حکومت ته نه ښايي چې د خیریه او مرستندویه موسسو په چارو کې لاسوهنه وکړي بلکې دنده لري چې د دغو موسسو د هڅولو لپاره د هغوی امنیت ټینګ کړي او د مرستو وېشلو پرمهال حق حقدار ته سپارلو کې همکاري وکړي.»
د اوچا له لوري دا څرګندونې داسې مهال کېږي چې د ځینو نړیوالو مرستندویه ټولنو له لوري لا له وړاندې د را روان ژمي په اړه اندېښنې څرګندې شوې او وايي، افغانان به له بد اقتصادي وضعیت سره مخ وي.
