د بهرنیوچارو وزارت سرپرست مولوي امیرخان متقي د ترکیې په ستانبول ښار کې د افغانستان له کونسلګرۍ په لیدنه کې افغان ډیپلوماتانو ته د خبرو پرمهال ویلي، چې له خلکو سره ښه چلن وکړي او پر وخت خدمات وړاندي کړي.
متقي له دغو ډیپلوماتانو سره په خبرو کې ویلي، په اروپا کې پخوانیو ټولو ډیپلوماتانو ته درې کاله وخت ورکړل شو، ترڅو د اسلامي امارت له بهرنیو چارو وزارت اطاعت وکړي، خو یو شمېر حاضر نه شول.
د متقي په خبره، د دې نا فرمانۍ په پایله کې د افغانستان د ځینو اروپايي سفارتونو او کونسلګریو له خوا صادرېدونکي اسناد بې اعتباره اعلان کړل.
متقي زیاته کړې: « موږ په اروپا کې پخوانیو ډیپلوماتانو ته درې کاله وخت ورکړ چې له مرکز څخه اطاعت وکړي، خو له بده مرغه ځینې ډیپلوماتان حاضر نه شول او بالاخره موږ اړ شوو چې د یو شمېر سفارتونو او ګنسلګریو له خوا وېشل کېدونکي اسناد بې اعتباره اعلان کړو.»
متقي دغه راز ویلي، له هېوادونو سره د تعامل په برخه کې ښې لاسته راوړنې لري او په دې وروستیو کې ګڼ شمېر هېوادونو د اسلامي امارت سفیران او سیاسي استازي منلي دي.
د ده په خبره، ځينې نور هېوادونه هم شته چې له افغانستان سره تعامل ته لېواله دي او نږدې راتلونکي کې به له نړۍ سره د تعامل لمن لاپسې پراخه شي.
متقي زیاتوي: « تاسو وینئ چې په دې وروستیو کې د سیاسي تعامل له پلوه زیاتې لاسته راوړنې لرو. متحده عرب اماراتو او ازبېکستان زموږ سفیران ومنل؛ ترکمنستان او قزاقستان زموږ شازدافیران ومنل. په نږدې ورځو کې به د ځینو نورو هېوادونو له خوا هم ورته تحول ووینو.»
دغه رازد ریاست الوزرا سیاسي مرستیال مولوي عبدالکبیر وايي، له هېوادونو سره د سیاسي تعامل په برخه کې د امریکا له مخالفتونو سربېره زیات پرمختګ شوی او دا مهال په بهر کې لسګونه سیاسي استازولۍ لري چې د دوی د متوازن او بې طرفه بهرني سیاست پایله ده.
عبدالکبیر زیاتوي: « موږ همدا اوس په نړۍ کې ۴۰ سیاسي استازولۍ لرو. سره له دې چې امریکا مخالفت کوي، خو بیا هم د دومره سیاسي استازولیو لرل، زموږ پر سالم خارجي سیاست دلالت کوي. هڅه دا ده چې له ټولې نړۍ سره مثبت تعامل ولرو او هرځای سفرونه وکړو.»
له بلې خوا، د بهرنیو چارو وزارت سرپرست د ترکیې په استانبول کو نسلګرۍ کې له ټولو ډیپلوماتو وغوښتل چې افغانانو ته غوره او پر وخت خدمات وړاندې کړي.
متقي زیاتوي:« کله چې زموږ هېواد وال د ترکیې له لرې ځایونو راځي او په کونسلګرۍ کې خدمتونو ته اړتیا لري، تاسو باید له هرڅه وړاندې د هغوی درناوی وکړی او کار یې ژر تر ژره ور خلاص کړی؛ دا زموږ دستور او پالیسي ده.»
د مالوماتو له مخې، د جرمني په ګډون یو شمېر اروپايي هېوادونه لېواله دي، چې د افغانستان له اوسني نظام سره تعامل ولري، کابل ته خپل سیاسي استازي راولیږي او همدا راز د افغانستان ځینې سیاسي نماینده ګۍ کابل ته وسپاري.
