د ننګرهار ولایت اوسېدونکي په دغه ولایت کې د سیمکارټونو له کمښت، کمزوري انټرنېټ، د انټرنېټي کڅوړو له لوړو بیو او د مخابراتي شبکو د پېرودونکو لپاره د څانګو کمښت له امله شکایت کوي او وايي، په څو ورځو کې هم نه شي کولی، د خپلو سیمکارټونو ستونزې حل او یا نوی سیمکارټ واخلي.
د جلال آباد ښار یو تن اوسېدونکی وايي: « د زیات بیروبار له امله نه شو کول، خپل سیمکارټونه ترلاسه کړو. بله خبره دا ده، چې د مخابراتي شبکو انټرنېټي کڅوړې ډېرې قېمته دي، حال دا چې ټولو ځایونو ته زېګنال هم نه شي رسولی.»
د جلال آباد ښار یو بل اوسېدونکی هم ورته خبره کوي او وزیاتوي: « د سیمکارټونو پر وېش بیروبار زیات دی او ستونزمنه ده، چې څوک په اسانۍ سیمکارټ ترلاسه کړي. دلته د مخابراتي شبکو استازولۍ کمې او ګڼه ګوڼه په کې زیاته ده. همدارنګه انټرنېټ په لوړه بیه پلورل کېږي.»
ځېنې نور بای وايي، سیمکارټونو کې د عادي ستونزې پیدا کېدو په صورت کې هم اړ دي، چې د مخابراتي شبکو دفترونو کې په ورځو ورځو انتظار وباسي.
د جلال آباد ښار یو تن اوسېدونکی په دې اړه وايي: « باید د انټرنېټ کیفیت لوړ او نرخونه یې راټیټ شي. په نمایندګیو کې ډېره ګڼه ګوڼه وي، موږ غریب خلک یو نه شو کولی څو ورځې انتظار وباسو.»
د ننګرهار یو بل اوسېدونکی بیا وايي: «باید د مخابراتي پوښښ لپاره آنتنونه او د سیمکارټونو د وېش لپاره نمایندګۍ زیاتې شي.»
هڅه مو وکړه، د خلکو د ستونزو په تړاو د ننګرهار مخابراتو ریاست او اترا ادارې نظر له ځانه سره ولرو، خو د مسوولینو له خوا راته وویل شول، چې د وزارت د رسمي مکتوب پر بنسټ له رسنیو سره د خبرو کولو اجازه نه لري.
د خلکو ټینګار دا دی،چې مخابراتي شبکې دې، د سیمکارټونو د وېش، پوښښ ساحې پراخوالي، پیرودونکو خدمتونو څانګو کې د اسانتیاوو برابرولو سربېره د انټرنېټ بیې هم ټیټې کړي.
