روان کال په بلخ ولایت کې د انګورو حاصلات دوه برابره زيات شوي او دغه چاره د بڼوالو د خوښۍ لامل شوې خو دوی یوه اندېښنه هم لري.
د بڼوالو په وينا، سږ کال طبیعي آفتونو د انګورو حاصلاتو کیفيت اغېزمن کړی او دوی نه دې بریالي شوي، چې د نباتي درملو په وسیله د دغو آفتونو مخه ونيسي.
یو تن بڼوال دور محمد وايي: «زموږ حاصلات د تېر کال په پرتله یو په دوه زیات شوي، خو روان کال زموږ په بڼونو کې یو ډول چینجی پيدا شوی، چې د درملو په وسیله له منځه نه ځي. که څه هم د ونو د پاڼو په کمولو سره مو وکولی ش، چې تر ۵۰ سلنو د دغه آفت مخه ونیسو،خو د بشپړ مخنیوي لپاره یې د کرنې له ریاست څخه د مرستې غوښتنه کوو.»
یو بل بڼوال محمد صابر بیا وايي: «په بازار کې پلورل کېدونکي درمل بې کیفیته دي، هرڅومره مو چې په انګورو وپاشل، د آفت مخنیوی یې ونه کړ. موږ له دولته غوښتنه کوو، چې باغ لرونکو ته اصلي درمل ورکړي.»
د بلخ کرنې ریاست د مالوماتو پر بنسټ، په دې ولایت کې پر شاوخوا ۳ زره ۵۰۰ هکټاره ځمکه باندې د انګورو باغونه کېنول شوي او تمه کېږي،چې روان کال شاوخوا ۳۰ زره ټنه د انګورو حاصلات ورکړي.
د بلخ کرنې ریاست کې د ترویج مدیر محمد حسین عظیمي وايي: « په بلخ ولایت کې د انګورو ۳ زره ۴۷۰ هکټاره باغونه په بلخ، نهرشاهي، دهدادي، چاربولک، چمتال، شولګره او شور تپې ولسوالیو کې موجود دي. د تېر کال پرتله د حاصلاتو اوسط ډېر ښه دی او بڼوال راضي دي. ویلی شم، چې سږ کال زموږ حاصلات سل په سلو کې ښه دي.»
د بلخ په ډېری ولسواليو کې مېشت خلک د خپل ژوند لومړنۍ اړتياوې د کرنې، بڼوالۍ او مالدارۍ له لارې پوره کوي.
دوی وایی، که سرپرست حکومت یې د ملاتړ لپاره ځانګړې پاملرنه وکړي، نو له دې لارې پر ځان بسیا کيدلی شي.
