وروسته له هغې، چې افغانستان ته د ملګرو ملتونو د بشري حقونو شورا ځانګړي استازي ریچارډ بېنېټ د افغانستان په هکله څو راپورونه وړاندې کړل او په ډېرو راپورونو کې یې سرپرست حکومت باندې نیوکې وکړې، چې د ښځو له حقونو یې سرغړونه کړې، اسلامي امارت افغانستان ته د نوموړي پر سفر بندیز ولګاوه او د هغه راپورونه یې مغرضانه وبلل.
د اسلامي امارت دغه پرېکړه د نړۍ په کچه له غبرګونونو سره مخ شوه. د دغو غبرګونونو په لړ کې تازه د اروپایي ټولنې ویلي، دغه پرېکړه د اندېښنې وړ ده او په کار ده، چې اسلامي امارت پرې له سره غور وکړي.
د اروپایي ټولنې بهرني سیاست د دفتر ویاند پیټرسټانو وايي:« افغانستان ته د ملګرو ملتونو د ځانګړي استازي پر سفر د بندیز لګولو په اړه د طالبانو پر پرېکړه خواشیني څرګندو او له دوی غوښتنه کوو، چې په دې پریکړه له سره غور وکړي. طالبان باید هغه ته د راپور او اسنادو چمتو کولو په موخه افغانستان ته د بې خنډه لاسرسي اجازه ورکړي.»
ملګرو ملتونو او د بشر حقونو څار نړیوال سازمان هم غبرګون ښودلی او دغه پرېکړه یې بشري حقونو ته سپکاوی او له نړیوالو قوانینو سره په ټکر کې بللې.
د ملګرو ملتونو د سرمنشي ویاند سټیفن دوجاریک وايي: « زموږ لپاره د ځانګړي راپور ورکوونکي ماموریت، چې د عمومي منشي څخه په بشپړه توګه خپلواک دی، د بشري حقونو د جوړښت یوه مهمه برخه ګڼل کیږي.»
سره له دې، چې اسلامي امارت په خپله درې کلنه دوره کې د ملګرو ملتونو او اروپایي ټولنې له بېلابېلو بندیزونو او فشارونو سره مخ دی، بیا هم له ګڼو هېوادونو سره د ډیپلوماټیکو اړیکو په جوړولو بریالی شوی.
د سیاسي چارو شنونکي وایي، د ریچارډ بېنېټ پر سفر د بندیز پرېکړه ښايي له نړۍ سره د سرپرست حکومت اړیکې نورې هم اغیزمنې کړي.
د سیاسي چارو کارپوه ډاکټر کمال سادات وايي: « د ملګرو ملتونو د ځانګړي راپورټر پر سفر د بندیز پرېکړه یو څه په بېړه شوې. دا به هم دولت او هم ملت ته زیان ولري. دولت ته یې زیان دا دی، چې د رسمیت پېژندلو پروسه به یې لا اوږده شي او ملت ته به یې زیان دا وي، چې ښايي ملګري ملتونه خپلې بشردوستانه مرستې کمې او د خپلو فعالیتونو ساحه محدوده کړي.»
ریچارډ بېنېټ په هرو درېیو میاشتو کې د افغانستان د بشري وضعیت په اړه راپور چمتو او ملګروملتونو ته یې وړاندې کوي.
د نوموړي په ډېری راپورونو کې سرپرست حکومت په دې تورن شوی، چې د بشرحقونه او په ځانګړي ډول د ښځو حقونه یې نقض کړي. اسلامي امارت ډېر کله د نوموړي راپورونه له حقیقت لرې او مغرضانه بللي. کارپوهان وایي، د اروپایي ټولنې په ګدون ټول هغه نړیوال سازمانونه، چې د افغانستان په هکله راپورونه چمتو کوي، باید په کې د افغانستان ملي، دیني او کولتوري ارزښتونو ته پاملرنه وکړي.
د سیاسي چارو شنوونکی امیر ګران وايي: « باید له ملګرو ملتونو، نورو هېوادونو او موسسو سره د افغانستان د ملي ګټو په رڼا کې یوه مثبت تعامل ته ادامه ورکړل شي. سره له دې چې بشري فکټورونه ډېر اهمیت لري، خو د یوه سیاسي جوړښت په ساحه کې د پالیسیو جوړول هم باید د افغانستان د ملي ګټو پر محوریت وي.»
اسلامي امارت تېره اوونۍ تایيد کړه، چې د افغانستان لپاره د ملګرو ملتونو د بشري حقونو ځانګړی راپور ورکوونکی ریچارډ بېنېټ یې ځکه افغانستان ته له راتګ منع کړی، چې د افغانستان په اړه د ناسمو مالوماتو پر بنسټ راپورونه چمتو کول.
