په داسې حال کې، چې د هېواد لوی ښارونه د ژمي په راتګ سره د ډبرو سکرو په لوګي کې پټ وي او له امله یې ګڼ شمېر خلک د روغتونو تر کټونو رسېږي، یو شمېر افغان انجنیرانو د دغې ستونزې د هواري لاره موندلې ده.
محمد رفیق امیني یو له هغه پنځو انجنیرانو دی چې د انجنیرۍ تخنیک په څانګه کې یې لوړي زده کړې کړې او په خپل نوښت سره یې د لومړي ځل لپاره په هرات ولایت کې د لوګي تصفیه کولو ماشین، له باد څخه د برېښنا د تولید توربین او لمریزه ژرنده ډیزاین او جوړ کړي دي.
هغه وایي، که سرپرست حکومت يې مالي ملاتړ وکړي او امکانات ورته برابر کړي، د نورو ورته وسايلو له جوړلو سربېره کولی شي په دې برخه کې نور ځوانان هم وروزي.
امیني زیاتوي:« که دولت رانه ملاتړ وکړي، له دې سربېره نور ډېر اختراعات هم لرو. زما اختراعات کولی شي زموږ ټولنې او هېواد ته ګټه ورسوي.»
دغه مخترع انجنیران وايي، د دوی له خوا جوړ شوي ماشینونه د ګاونډیو هېوادونو په کچه بې ساري دي، لوړ کیفیت او ټیټ قميت لري.
د دغو انجینرانو له ډلې عبدالسلام افشان د خپل جوړ کړي ماشین ګټې داسې بیانوي: « زموږ له خوا جوړ شوی ماشین کولی شي، سل په سلو کې د ډبرو سکرو دود تصفیه کړي. بله ګټه یې دا ده، چې راټول کړی دود هم نه ضایع کېږي او په نورو ځایونو کې د کارولو لپاره پلورلو ته چمتو کېږي.»
دغه تخنيکي ماشینونه د یو خصوصي شرکت په مالي ملاتړ جوړ شوي.
د یاد شرکت مسوولین وایي، د ۵۰۰ زره امریکایي ډالرو په ارزښت یې پر دغه شرکت پانګونه کړې او غواړي، چې د نویو اختراعاتو په برخه کې خپلې پانګونې ته پراختیا ورکړي.
د دغه شرکت مشر عبدالقدیم عظیمي وايي: « موږ غواړو لا ماډرن او عصري ماشینري ولرو؛ د همدې لپاره په پام کې لرو، چې خپله پانګونه ډېره کړو. راتلونکی کال به له ۵۰۰ تر ۱۰۰۰کسانو کاګران ولرو.»
له دې وړاندې هم د هېواد پرکچه ګڼو نوښت ګرو ځوانانو ورته تخنيکي وسايل جوړ کړي، خو تراوسه سرپرست حکومت د دغو ځوانانو د انسجام لپاره د پام وړ ګام نه دی پورته کړی.
