د ملګرو ملتونو خوړو نړیوال پروګرام ( ډبلیو.ایف.پي) په خپل تازه راپور کې ویلي، د بودیجې کمښت نشتوالي لها مله یې له عامو افغانانو سره د مرستو اندازه کمه شوې او له همدې امله، د خلکو د ژوندانه هغه اساسي برخې چې دوی یې ملاتړ کاوه له ګواښ سره مخ شوې دي.
راپور کې ويل شوي، يادو ستونزو ته په کتو ډېر احتمال شته، چې د خوړو نړيوالو پروګرام به په راتلونکي کې ونه شي کړی، څو د پخوا په څېر د افغانانو خوراکي امنیت تضمین کړي.
د راپور یوه برخه:« موږ دا مهال په افغانستان کولی شو، یوازې یو میلیون اړمنو خلکو سره مرسته وکړو. ۱۱ میلیونه اړمن خلک د بودیجې نشتوالي له امله بېړنۍ خوراکي مرستې نه شي ترلاسه کولی، په داسې حال کې، چې ۱.۴ میلیونه مېندې او ماشومان د خوارځواکۍ مخنیوي لپار د تغذیې ځانګړي خواړه نه شي ترلاسه کولی.»
د خوړو نړيوال پروګرام وروستيو سيلابونو ته په پام د راپو په يوه بله برخه کې افغانستان د اقليمي بدلون د ناوړه اغېزو له امله د زيان منونکو هېوادونو په ډله کې شپږم هېواد بلل شوی.
په راپور کې ياد مرګوني سېلابونه د اقلیمي بدلونو د ناوړه پایلو یوه بېلګه ياده شوې ده.
د راپور یوه برخه:« په افغانستان کې اقلیمي بدلون د خلکو لپاره ننګونې لا زیاتې کړې. د ۲۰۲۴ کال په پسرلي کې مرګوني بارانونه په ټول هېواد کې د سېلابونو د راوتلو لامل شول، چې کلي یې ویجاړ او د یو شمېر کورنیو ژوند یې سخت اغېزمن کړ.»
په ورته مهال د سیاسي چارو کارپوهان وایي، په افغانستان کې د بهرنیو مرستو کمېدل به پر بېلابېلو برخو منفي اغېز وکړي او وړانديز کوي، چې نړیوال دې مرستې نه سیاسي کوي او له سرپرست حکومت سره په همغږۍ دې د اړمنو افغانانو لاسنیوی وکړي.
د خوړو نړیوال پروګرام د تېر کال په وروستیو میاشتو کې هم ویلي ول، چې په خپل تاریخ کې له تر ټولو بد مالي کړکېچ سره لاس ګرېوان دی او نه شي کولی پر نړيوالو کچه د اړمنو خلکو خوراکي امنيت تامين کړي.
دغه پروګرام د ۲۰۲۴ تر پايه له اړمنو افغانانو سره د مرستې لپاره ۶۱۷ ميليونه ډالرو بسپنې غوښتنه کړې.
