په داسې حال چې د افغانستان لپاره د ملګرو ملتونو د دوحې درېیمې ناستې ته د ګوتو په شمېر ورځې پاتې دي، خو تر دې وړاندې ټاکل شوې د دې سازمان امنیت شورا نن د جون پر ۲۱مه د یوې بلې ناستې کوربه دی.
د افغانستان لپاره د ملګرو ملتونو سیاسي استازولۍ (یوناما) پر خپله اېکس پاڼه لیکلي، د یوناما مشره روزا اتونبایوا به په دې ناسته کې د افغانستان د وضعیت په تړاو توضیحات ورکړي.
که څه هم په دې تړاو جزئیات نه دي ورکړل شوي چې د نوموړې موخه له وضعیت ده؛ خو ټاکل شوې چې دغه ناسته به د کابل پر مهال نن ۶:۳۰ دقیقې پیل شي.
یوناما زیاته کړې:« د افغانستان لپاره د ملګرو ملتونو د سیاسي استازولۍ (یوناما) مشره روزا اتونبایوا، سبا د جون پر ۲۱مه، د دې سازمان امنیت شورا ته د افغانستان د وضعیت په تړاو توضیحات ورکوي.»
که څه هم تر دې دمه د ناستې په تړاو نور جزئیات نه دي ورکړل شوي، چې په کې به پر کومو مسائلو تمرکز وشي.
خو د سیاسي چارو شنونکي وايي، ښايي بشري حقونو شورا ته د ملګرو ملتونو د ځانګړي راپور ورکوونکي ریچارډ بېنېټ د وړمې ورځې د راپور په څېر به د نن په ناسته کې هم د افغان ښځو او نجونو او په ټوله کې به پر روان بشري وضعیت بحث وشي.
د سیاسي چارو شنونکی معین ګل څمکنی وايي:« مالومېږي، چې د ملګرو ملتونو ټول تمرکز به پر بشري حقونو باندې وي، د تېر په څېر به دوی د نشه يي توکو کمښت، همداسې د تروریزم کمښت په اړه ډېر څه ونه وايي، خو اساسي نقطه به یې همدغه د بشري حقونو مساله وي، ځکه ریچارډ بېنېټ هم دا موضوع وړاندې کړې. خو دا بیا هغه جریان پورې اړه لري، چې کله د دوحې درېیمه ناسته جوړه شي، چې په هغه کې به طالبان ګډون وکړي او که نه؟ څه تغییر خو به په اجنډا کې نه راځي.»
له دې وړاندې هم یوناما او ګڼو اړونده نړیوالو ادارو د افغانستان د وضعیت په تړاو توضیحات او ورته راپورونه وړاندې کړي؛ خو تر دې دمه یې ملموسې او د پا موړ پایلې نه دي لري.
د سیاسي چارو شنونکي يې اصلي لامل د غړو هېوادونو له مهمو مسایلو سره د ملګرو ملتونو ناخپلواکه چلن یادوي چې په وینا یې یادو ورته حیاتي مسایلو سره د عیني واقعیتونو خلاف، شرایطو او اجنداوو ته په کتو له مسایلو سره چلن کیږي.
د سیاسي چارو شنونکی عزیز معارج وايي:« دوی د خپلې اجنډا پر اساس نړۍ ته تصویر ورکوي، کله ښه وايي، کله یو څه وايي او کله بل څه وايي، نو ډېر اعتبار ورباندې نه شته دی. که چېرې واقعا دوی اصول پلې کړي او واقعا افغانستان د یوه خپلواک هېواد او وګړو ته یې د بشر په سترګه وګوري او نړیوالو اصولو پر اساس باندې چلن وکړي، خپلې موخې له قانون سره سمې مخې ته یوسي، بیا اعتبار پیدا کوي او خلک پرې اعتبار کوي او د دوی ناستو ته هم هېله من کېږي. »
دا په داسې حال کې ده، چې ټاکل شوې د روانې جون میاشتې پر ۳۰مه د ملګرو ملتونو سازمان په کوربتوب د دوحې درېیمه دوه ورځنۍ ناسته ترسره شي، چې په کې به د ګڼو هېوادونو د استازو ترڅنګ د سرپرست حکومت استازی هم ګډون ولري.
اسلامي امارت بیا له اوږده ځڼډ وروسته په دې ناسته کې ګډوڼ تائید کړی؛ خو ویلي یې دي، له دوی سره د شریکې شوې اجنډا له بدلون سره به په دې ناسته کې ګډوڼ ونه کړي.
