د کونړ ولایت دانګام ولسوالۍ اړوند ګورېګا دره کې، وروستیو ورښتونو او سېلابونو خلکو ته برخو کې درانه مالي زیانونه اړولي دي.
د سیمې خلک وايي، په دې دره کې ۱۸ کلیو کط سلګونه کورنۍ ژوند کوي، چې د لارو او پلونو خرابوالي او د ژوند نورو اسانتیاوو ته د نه لاسرسي له امله له سختو ننګونو سره مخ دي.
د کونړ دانګام ولسوالۍ اوسېدونکی وايي: « د دې خوړ له امله یوه میاشت موږ ته خرچه نه وه، ډاکټران نه وو، ناروغان مو د خوړ ها غاړه ایسار وو، لنډه دا چې دې خوړ موږ ته ډېر زیانونه اړولي او موږ یې له سختو ستونزو سره مخ کړي یو.»
د کونړ دانګام ولسوالۍ یو بل اوسېدونکی وايي: « دا خلک سهار راغلي دي او لرګي په اوږو پورې باسي، همداسې د اوړو بوجۍ او نور شیان هم ټول په اوږو پورې باسي.»
د سیمې اوسېدونکي دغه راز وايي، په خپلو شخصي لګښتونو یې د سیند د پاسه د پلونو جوړولو هڅې پیل کړي؛ خو په خبره یې دا چاره د دوی له توانه پورته ده او له سرپرست حکومته غوښتنه کوي، چې په دې برخه کې بېړني ګامونه واخلي.
د دانګام ولسوالۍ اوسېدونکی وايي: « ۲۰ ځلې تللي یو، حکومت ته مو عریضي کړې دي، په هر ارګان او موسسې پسې ګرځېدلي یو؛ خو تراوسه چا هېڅ غور نه دی کړی.»
په همدې حال کې د کونړ د دانګام ولسوالۍ ولسوال محمد کریم عمر صدیق وايي، د ولسونو له ستونزو خبر دي او هڅې یې پیل کړي، چې د حکومت او مرستندویه ادارو پر مټ به په دې ولسوالۍ کې تخریب شوې سیمې ورغوي او زیانمنو ته به مرستې ورسوي.
صدیق زیاتوي: « تېرو ورښتونو خلکو ته زیانونه وراړولي دي او ولسوالۍ ته په دې اړه ډېرې عریضي هم راغلي. موږ خپله کمېټه ټاکلې ده چې په رښتیني توګه هغه تخصیص مالوم کړي چې چاته زیان رسېدلی او چاته نه، کومې ځمکې تخریب شوې، دا ټول مالومات چې کمېټه تائید کړي له دې وروسته به یې بیا ان شاءالله موږ له خپلو مشرانو سره شریکوو او تر خپلې وسې به همکاري کوو.»
وټه پور، پېج دره، چپه دره، سرکاڼو، خاص کونړ، شیګل، شلتن، آسمار، ناړۍ او غازي آباد د کونړ له هغو ولسوالیو دي، چې وروستیو ورښتونو او سېلابونو خلکو ته د مرګ ژوبلې ترڅنګ لسګونه استوګنیز کورونه، زرګونه جریبه کرنیزه ځمکه او ولاړ فصلونه او باغونه، لویې او فرعي لارې تخریب او خلک یې له ګڼو ستونزو سره لاس او ګرېوان کړي.
