خان بيبي په هرات ولایت کې د تېرې شدیدې زلزلې له امله د خپلې کورنۍ درې غړي له لاسه ورکړي او سخت ژمی یې په خېمو کې تېر کړی.
اوس چې سرپناه ورته برابره شوې، په خپله سیمه کې د ښځ، لپاره د زېږون پر مهال د روغتیايي خدمتونو نشتون ته اندېښمنه ده.
هغه وایي، ډېری وختونه د زېږون پر مهال دغلته د روغتیایي مرکز نشتون له امله د ښځو او ماشوم ژوند له ګواښ سره مخ کېږي.
خان بيبي زیاتوي: « له بده مرغه لار مو ډېره لرې ده چې ناروغ ولرو ډېره راته سخته وي، ډاکټر نشته او نږدې کلینیک هم نه لرو.»
د هرات یوه بله اوسېدونکې نګارهم ورته اندېښنه لري او وایي، موده وړاندې يې يوې خورلڼې د زېږون پرمهال له دې کبله ژوند بايلود، چې په کلي کې يې روغتيايي مرکز نه و او ښار ته د خرابو لارو له امله ناوخته رسېدلې وه.
نګار له سرپرست حکومته غواړي، چې په کلي کې یې روغتیایي مرکز جوړ او روغتیایي خدمتونو ته د ښځو لاسرسی اسانه کړي.
هغه زیاتوي: « ناروغان په لاره کې له سختو ستونزو سره مخ کېږي، په اسانۍ د ښار روغتون ته نه شو رسېدی، ان ډېری وخت یا مور او یا ماشوم روغتون ته تر رسېدو وړاندې خپل ژوند له لاسه ورکوي.»
بل خوا ځایي مسوولین هم په لرو پرتو سيمو کې د روغتیایي مرکزونو کمښت له امله د خلکو ستونزې مني؛ خو ډاډ ورکوي چې دا مهال محرومو سیمو ته پاملرنه زیاته شوې او په یو شمېر سیمو کې روغتیایي کلینیکونه هم جوړ شوي.
د هرات د والي ویاند نثار احمد الیاس وايي: « په ځېنو ولسوالیو کې اړتیا ته په کتو کلینیکونه جوړ شوي او اوس لپاره چې نفوس ډېر شوی نو مسوولین هڅه کوي چې کلینیکونه په روغتونونو تبدیل کړي، همداراز هغه سیمې چې له ولسوالیو څخه لرې دي هغوی ته هم روغتیايي خدمات وغځوي او په راتلونکي کې به دا خدمات بشپړ شي.»
دا په داسي حال کې ده، چې یو شمېر لرو پرتو سیمو کې د روغتیایي خدمتونو ترڅنګ ښځې او ماشومان ان د ژوند لومړنیو امکاناتو څخه هم بې برخې پاتې شوي.
