د ملګرو ملتونو بشري حقونو سترې شورا په ناسته کې چې دوشنبه پيل شوې، د بېلابېلو هېوادونو استازو په افغانستان کې د بشري حقونو پر وضعیت نیوکې کړې دي.
د دې شورا غړيو هېوادونو استازو د سرپرست حکومت له لوري پر ښځو او نجونو د کار او تعلیم بندیز، په زندانونو کې شکنجې، د بیان پر ازادۍ محدوديت او د اقلیتونو حقونه له پامه غورځول د بشري حقونو د نقض اساسي برخې یادې کړي.
د ملګرو ملتونو د بشري حقونو سترې شورا کې د افغانستان استازی نصیر احمد اندېشه وايي، د بشري حقونو د ارزونې په دوريي ناسته کې د افغانستان بشري حقونو موجوده وضعيت د سمون لپاره نږدې ۲۳۰ وړاندیزونه شوي، چې د ناستې په راتلونکو ورځو کې به پرې بحث وشي.
نوموړی زیاتوي، یوازې روسیې په افغانستان کې د بشري حقونو د نقص په تړاو له مطرح شویو مواردو سره مخالفت درلود او په خبره یې، روسيه باروي ده چې امريکا د خپل ليدلوري له مخې په افغانستان کې بشري حقونه نقض شوي بولي.
اندېشه وايي: « نږدې ۲۳۰ نوي وړاندیزونه مطرح شول چې په راتلونکو درېیو ورځو کې موږ دغه وړاندیزونه راټولوو او وروسته یې بیا ګورو چې څنګه پر دې وړاندیزونو کار وشي.»
د اسلامي امارت د ویاند مرستیال احمد الله فطرت د ملګرو ملتونو د بشري حقونو سترې شورا په غونډه کې د افغانستان په اړه بحث ته په غبرګون کې وایي، له دې ډول ناستو د لوېديځ هدف په افغانستان کې د خپلو نسخو تطبيقول دي او په خبره يې د ښځو او نجونو حقونه یې د شریعت له مخې ورکړي دي.
فطرت زیاتوي: « د افغانستان اسلامي امارت د واکمن نظام په توګه خپلو ټولو اتباعو ته د اسلامي او شریعي حقونو ورکړې ته ژمن دی؛ نو دا چې غربي نړۍ په افغانستان کې چې دا یوه اسلامي ټولنه ده غربي حقونو د پلي کېدو غوښتنه کوي؛ دا په اصل کې د غربي فرهنګ د تپلو یوه هڅه ده چې افغانان یې په هېڅ ډول نه مني. افغانان ټول اسلامي او شریعي حقوق غواړي او دا د اسلامي نظام له لوري ورکړل شوي دي.»
د سیاسي چارو یو شمېر کارپوهان وايي، سرپرست حکومت دې د ولس ملاتړ او له نړۍ سره د تعامل په موخه د ښځو او نجونو پر مخ د کار او تعلیم دروازې پرانېزي.
د سیاسي چارو کارپوه نجیب الرحمن شمال وايي: « هيله من یو چې اوسنیو شرایطو او د افغانستان د خلکو غوښتنو ته په کتو سره هېواد کې اړین بدلونونه څرګند شي، څو په نړیواله کچه د رسمیت پېژندنې موضوع مطرح شي. د دغه ډول سیاست په دوام سره شونې ده چې نه یوازې دا چې افغانستان به لا زیات د نړیوالې انزوا لور ته لاړ شي، بلکې مرستندویه ادارې، موسسې او هېوادونه چې له افغانستان سره مرسته کول غواړي، خپلې مرستې محدودې او یا په بشپړ ډول قطع کړي او دا کار به په اوسنیو شرایطو کې هېڅ د افغانانو په ګټه نه وي.»
د ملګرو ملتونو بشري حقونو ستره شورا هر پنځه کاله وروسته په ۱۴ هېوادونو کې د بشري حقونو د ارزونې په تړاو ناسته لري، چې په دوريي ډول په مختلفو هېوادونو کې بشري حقونه په کې ارزول کېږي.
يادې ناستې ته درې راپورونه وړاندې شول، چې يو يې د ملګرو ملتونو د بشري حقونو په ستره شورا کې د افغانستان د استازولۍ له خوا چمتوو شوی و.
