د ښځو حقونو پر محدودیتونو د امریکا او نړیوالې ټولنې د اندېښنو پر دوام، په ملګرو ملتونو کې د امریکا دایمي استازې لېنډا ټوماس ګرینفیلډ پر نړيوالو د افغان ښځو حقونو په برخه کې د نه پرمختګ له امله نېوکه کړې.
ګرینفیلډ د نیوکې ترڅنګ دغه مساله ناهیلې کوونکې بللې او زیاته کړې يې ده، چې له دې سره به افغان ښځې راتلونکې پورې تړلې هیله له لاسه ورکړي.
ګرینفیلډ ویلي، امریکا د افغان ښځو اړونده مسایل هېڅکله نه هېروي او په خبره یې په دې برخه کې د بې شمېره ستونزو سره سره به، دغه هېواد په دې برخه کې د بندو دروازو د پرانېستلو هڅو ته دوام ورکړي.
هغې زیاته کړې:« زه ویلی شم دا ډېره ناهیلې کوونکې ده. موږ په دې برخه کې ډېر پرمختګ نه دی کړی او زه اندېښمنه یم، چې افغانې ښځې به خپلې هیلې له لاسه ورکړي. دا ډېره اړینه ده، چې تاسې په دې اړه پوښتنې کوئ او موږ هم په دې اړه خپلو پوښتنو ته دوام ورکوو، چې څه باید ترسره شي، څو افغانې ښځې په افغاني ټولنه کې مدغم شي.»
په ملګرو ملتونو د امریکا استازې د اسلامي امارت له بیاځلې واکمنۍ وړاندې تېره ۲۰ کلنه دوره د لاسته راوړنو له پلوه د پرمختګ دوره بللې، خو وايي، دغه لاسته راوړنې واک ته د سرپرست حکومت او د محدودیتونو له وضع کېدو وروسته له منځه تللي.
هغې ویلي، له افغان ښځو څخه خپل ملاتړ ته دوام ورکوي او په دې هڅې کې دي چې هغوی د ټولنې له حاشیې څخه د توجه مرکز ته راولي.
ګرینفیلډ وايي:« موږ د طالبانو له لومړۍ واکمنۍ وروسته د ښځو په برخه کې ګڼې لاسته راوړونې لرلې. خو اوس موږ وینو چې په دې برخه کې لاسته راونې له منځه تللي. زه ویلی شم، موږ د داسې لارو چارو په لټه کې یو، چې د افغانستان قضیې ته په کې رسېدنه وکړو، ښځې باید په لومړي سر او مرکز کې وي. موږ هغوی نه شو څنډې ته کولی، په داسې وخت کې موږ د یوه توافق په لټه کې یو.»
په ورته مهال د ښځو حقونو چارو یوشمېر فعالانې هم د کار او زده کړو برخه کې پر ښځو لګول شوي محدودیتونه یو ګام شاتګ ګڼي.
دوی په داسې حال کې چې له سرپرست حکومته د دې بندیزونو او محدودیتونو د لرې کېدو تر څنګ له نړیوالې ټولنې غواړي چې په دې برخه کې غلي پاتې نه شي.
د ښځو حقونو چارو فعاله فروزان داوودزۍ وايي:« د ښځو وضعیت په اړه باید ووایو، که چېرې له داخلي او خارجي بعد یې هم وګورو، یا ورته نظر وکړو، نو دواړه لوري هېڅ کوم پرمختګ یا لاسته راوړنه نه لري، ځکه نه په دې برخه کې نړیوالو بنسټونو کوم فعالیت درلود، چې هغه دې کومه پایله ولري او نه هم د اسلامي امارت مشرانو څرنګه یې چې په کراتو ویلي، چې دا دوی یوه داخلي موضوع ده ا و موږ هڅه کوو چې دا په داخلي شکل حل کړو.»
دا په داسې حال کې ده چې واک ته د سرپرست حکومت له رسېدو وروسته، د زدکړو، کار او یو شمېر ټولنیزو فعالیتونو په برخه کې پر ښځو محدودیتونه وضع کړل. حکومت که څه هم پر ښځو لګول شوي محدودیتونه لنډمهاله بللي او د یو مناسب او جامع میکانیزم تر جوړولو یې محدود کړي؛ خو د نږدې درېیو کلونو په تېرېدو سره لا هم دغه مسئله نه ده حل شوې؛ هغه څه په کور دننه او بهر یې شدید غبرګونونه راپارولي.
