د ۱۴۰۲ کال د ژمي لومړنۍ واوره د یکشنبې په ورځ د پلازمېنې کابل په ګډون په ډېری ولایتونو کې پیل شوه چې د عامو خلکو هیلې یې راوټوکولې.
خلک وايي، د تازه پيل شوي ورښت په وسيله به راتلونکی کال د احتمالي وچکالۍ په اړه د عامو افغانانو اندېښنې په نسبي توګه له منځه لاړې شي.
د کابل ښار اوسېدونکي وایي، ورښتونه د وچکالۍ ترڅنګ بېلابېلې ناروغۍ له منځه وړي او په خبره يې د هېواد په ابادۍ ښه اغېز لري.
د کابل ښار یو تن اوسېدونکی بهرام وايي: « زموږ مشرانو به ویل واوره تر سروزرو هم موږ ته ښه ده، هر څه ته ګټوره ده او دا د الله تعالی رحمت دی.»
د کابل ښار یو بل اوسېدونکی میراګل بیا وايي: « واوره هم رحمت دی، هم نعمت دی. بزګرانو، مریضانو او کلي، ولس ته ګټوره ده. له دې سره ناروغۍ له منځه ځي، فصلونه شنه کېږي؛ نو په هر لحاظ ګتوره تمامېږي.»
خلک که له یوې خوا ورښتونو ته خوښ دي، خو له بلې خوا په هېواد کې د یو شمېر بې وزلو په حال اندېښمن دي، چې د ژمي یخې شپې ورځې تر خېمو لاندې تېروي.
د کابل یو شمېر نور اوسېدونکي د سون او خوراکي توکو د بيو له لوړوالي شکایت کوي او وايي، له ورښتونو سره سم د سون توکو بیې یو پر دوه لوړېږي او د حکومت لخوا یې څارنه په ښه توګه نه کېږی.
د کابل ښار یو تن اوسېدونکی قربان الله وايي: « نرخونه ډېر لوړ دي لرګې په ۱۰۵۰۰ یا ۱۱۰۰۰ افغانۍ یو خاروار دي، له دې امله یې نرخ لوړ دی چې لرګي بند دي او طالبان یې نه پرېږدي وايي، تاسو شنه ځنګلونه وهۍ؛ نو موږ خو وچ لرګي راوړو شنه لرګي خو نه راوړو. د سکرو ډبرې هم اوس په ۱۳زره افغانۍ دي.»
د کابل ښار یو بل اوسېدونکی جهاد وايي: « په ټوله کې د خلکو اقتصاد خراب شوی، وضعیت سم نه دی، کاروبار نشته. له دولت مو غوښتنه دا ده چې موږ ته د کار زمینه برابره کړي څو خلک دنده پيدا کړي او هوسا ژوند ولري.»
له دې سره د کابل ښاروالۍ مسوولین د خلکو شکايتونه مني او د سون او خوراکي توکو د بيو کنټرول په اړه د خپلو هڅو د دوام خبر ورکوي.
د کابل ښاروالۍ استازی نعمتالله بارکزی وايي: « تاسې په جریان کې یاست چې د کابل ښاروالۍ په مشخصه توګه کابل کې له دوو کلونو له زیاتې مودې راهیسې نرخنامې توزیع کوي او ټول لومړني او د سون توکي په نرخنامه کې شامل دي او له مخې یې نرخونه کنټرول او څارل کېږي. د ډبرو سکرو په بیه کې د اسلامي امارت له لوري ځانګړی تخفیف په پام کې نیول شوی. هغه هوکړه لیک چې د کابل ښاروالۍ یې له کانونو او پټرولیم وزارت سره لري له مخې یې کابل ښار کې ۲۲ مرکزونه مشخص شوې چې په مناسبه بیه پېرل کوي.»
که څه هم خلک او بزګران ورښتونو ته خوښ دي خو له بلې خوا هېواد کې خراب اقتصادي وضعیت خلک اندېښمن کړي او د خراب اقتصادي وضعیت له امله د ژمي شپې او ورځې په سختۍ ورباندې تېرېږي.
دوی له حکومته غوښتنه کوي چې له بې وزلو سره مرستې وکړي ترڅو د ژمي شپې ورځې تر یوه بریده په اسانۍ تېرې شي.
