په داسې حال کی چې له دې مخکې د ترانزیټ په ګډون د هر ډول سوداګریزو توکو موټر چلوونکو ته په پاکستاني شناختي کارت او افغاني تذکره پر ډیورنډ فرضي کرښه له ترانزیټي لارو د تګ راتګ اجازه ورکول کېده؛ خو د تېرې جمعې په شپه پاکستان په یوه سملاسي پرېکړه کې د تورخم په شمول د غلام خان، ډنډې پټان لارې په دې پلمه وتړلې چې افغان موټر چلونکي ویزه نه لري.
د افغانستان او پاکستان لپاره د سوداګرۍ ګډې خونې مسوولین وایي، له پاکستاني چارواکو سره یې خبرې روانې دي تر څو دا ستونزه حل کړي؛ خو تر اوسه کومې پایلې ته نه دي رسېدلي.
د افغانستان او پاکستان ګډی خونې رئيس نقیب الله ساپي له شمشاد سره په خبرو کی وویل شاوخوا ۲۰۰۰ باروړونکی موټر دواړو خواوو ته له توکو بار ولاړ دي، چې د تګ اجازه نه ورکوي او له امله یې د دواړو غاړو سوداګرو ته درانه مالي زیانونه اوښتي دي.
ساپی زیاتوي: « د افغانستان خصوصي سکټور سره موږ په اړیکه کې یو هغوی په دې ډېر خواشینې دي او هڅه کوي چې له حکومت سره خبرې وکړي، د دولتونو ترمنځ هم خبرې شوې دي او دوې ورځې وړاندې په تورخم کې هم غونډه شوې چې بې پایلې پای ته رسېدلې ده، همداراز د پاکستان او افغانستان د حکومتونو ترمنځ هم اړیکې نیول شوي؛ نو هیلې شته چې دا ستونزې هوارې شي.»
د سیاسي چارو کارپوهان وايي، پاکستان تل د ترانزیټ او اقتصادي راکړې ورکړې څخه د افغانستان د خلکو او حکومتونو پر وړاندې سیاسي ګټه اخېستې او هڅه کوي د افغانستان حکومتونو باندې فشار راوړي.
دوی وایي، د پاکستان دا ډول پالېسي د دواړو هېوادونو پر زیان ده او تر ډېره د همدې هېواد اقتصاد کمزوری کوي.
د پوهنتون استاد فیض ځلاند وايی: « پاکستان تل ټرانزیټ او اقتصادي راکړې ورکړې او د افغانستان د اقتصادي کاروانونو څخه د افغانستان د ولس او د افغانستان د حکومتونو په خلاف سیاسي ګټه اخېستې.»
د سیاسي چارو کارپوه محمدیونس ځدران وايي: « زما په نظر مهمه خبره دا ده چې افغانستان اوسمهال د پاکستان دروازو ته دومره اړتیا نه لري، لکه څومره چې یې خپله پاکستان لري. دوی په دې کار تر ټولو لوی تاوان خپلو سوداګرو او اقتصاد ته رسوي، سره له دې چې د پاکستان اقتصادي وضعیت اوس هېڅ ښه نه دی؛ خو بیا هم سیاسي مسایل له اقتصادي مسایلو سره ګډوي.»
د افغانستان او پاکستان د سوداګرۍ ګډې خونې مسوولین وایي، د پاکستان حکومت ته په کار وه چې د دغسې پرېکړې پر مهال یې مخکې له مخکې افغان سوداګرو ته خبرتیا ورکړې وای، تر څو سوداګرو ته په دومره لویه کچه مالي زیانونه نه وای اوښتي.
افغانستان له پاکستان سره ۵ ترانزیټي لارې لري چې د دوړاو خواوو سوداګر له همدغو لارو هره ورځ په سلګونه کانټينرونو او باروړونکو موټرو کې تجارتي اموال لېږدوي.
