له تېرو دوو کلونو راهیسې په پاکستان کې ناامني زیاته شوې، بریدونو او چاودنو زور اخېستی، چې اسلام اباد یې ادعا پر افغانستان کړې، دا هغه څه دي چې کابل یې په کلکه ردوي او زیاتوي چې دا د پاکستان داخلي ستونزه ده او افغانانو پورې هېڅ ډول تړاو نه لري.
په ورته مهال د مخکېني حکومت یوه تن چارواکي معصوم ستانکزي چې د افغانستان د سقوط شوي جمهوریت کې پر بېلابېلو مهمو پوستونو یې دندې تر سره کړي، چې یوه یې هم د هغه مهال د ملي امنیت د ریاست دنده وه وايي، پاکستان اوس په خپله لومه کې راګېر دی.
مصعوم ستانکزي ویلي، هغه سخت دریځې او توند لارې ډلې او ټپلې چې پاکستان روزلي اوس بېرته پاکستان ته په ګواښ بدلې شوې دي.
ستانکزی وايي، دغه ډلې اوس د اسلام اباد له کنټروله وتلي دي او د افغانستان پر وړاندې د دغه هېواد ناسمو سیاستونو سیمه ناامنه کړې.
هغه زیاتوي:« په سیمه کې ناامني د افغانستان پرضد د پاکستان د تېرو لسیزو ناکامه سیاستونه دي چې تندلاري نیابتي ډلې يی روزلي او نن يي خپل هېواد ته ګواښ پېښ کړی. پاکستاني طالبان او نورې جنګي ډلې پاکستان روزلي او اوس يي له کنټروله وتلي دي.»
همدا راز ستانکزی د افغانستان له اوسني حکومت غوښتي چې په سترو هېوادنیو مسایلو کې باید له ولس مشوره واخلي.
کارپوهان هم د پاکستان په تړاو ورته نظر لري.
دوی وايي، د اسلام اباد له لوري د سخت دریځۍ روزنه او په سیمه کې د خپلو اهدافو لپاره ترې ناسمه ګټه اخېستنه هغه څه دي چې اوس یې د پاکستان لمنې ته اور رسېدلی او بیه یې پرې کوي.
د سیاسي چارو شنونکی کمال ناصراصولي وایي: « د سخت دریځو ډلو روزل، د خپلو اهدافو تعقیبول او په افغانستان، سیمه او تر هنده له سختو دریځو ډلو ناوړه ګټه اخېستل ټول هغه څه وو، چې د پاکستان د پوځ په مقابل کې یې اوس د پاکستان عام خلک هوښیار کړي او ځېنې سخت دریځې ډلې بېرته پر همدوی راګرځېدلي؛ نو د غلطو پالېسیو پایله تل غلطه وي.»
د سیاسي چارو شنونکی توریالی ځاځی بیا وايي، پاکستان د افغانستان هغه ګاونډی دی چې له تېرو ۴۵ کلونو راهیسې یې د افغانانو ترمنځ نفاق او جګړو ته لمن وهلې، اوس هم نه غواړي چې افغانستان دې ثبات ولري او افغانان دې د ارام ساه واخلي.
د ځاځي په خبره، پکار ده چې افغان لوری د خپلې ځواکمنې او پر ملي ګټو ولاړې دیپلوماسۍ پر بنسټ د دغه هېواد پر وړاندې دریځ ولري.
هغه زیاتوي: « ۴۵ کاله یې په دې وطن کې جګړې ته لمن ووهله او اوس هم نه غواړي دا وطن ارامه پرېږدي. نور باید د دغو ټولو بشري جنایتکاره هېوادونو چې په دا ۴۵ کلونو کې یې زموږ پر هېواد ناروا ظلمونه کړي؛ مخه ونیسو، خپلې ډيپلوماتیکي اړیکې وساتو او دوی ته دا حق ور نه کړو چې زموږ په کورنیو مسایلو کې لاسوهنه وکړي.»
په ټوله کې غوښتنه دا ده چې پاکستان ته پکار دي نه یوازې د افغانستان پر وړاندې، بلکې د ټولو ګاونډیو او سیمې پر وړاندې په خپلو سیاستونو او پالېسیو کې ژور بدلون راولي او هغه ستراتیژۍ د تل لپاره هېرې کړي چې په تېرو ۴۰ کلونو کې یې تعقیب کړې دي.
