داعش وسله والې ډلې داسې مهال په پلازمينه کابل کې د چاودنې مسوولیت منلي، چې د سرپرست حکومت د دفاع وزارت سرپرست ملوي محمد یعقوب مجاهد څو ورځی وړاندی په یوه خبري غونډه کې ادعا وکړه، چې د دې ډلې بریدونه ۹۰ سلنه کم شوي دي.
يعقوب زياته کړې وه، چې د يادې ډلې له لوري په ترسره شوو بريدونو کې بهرني وګړي دخيل دي.
خو د کابل په لوېديځو کې د سوارلۍ پر کاسټر شوې چاودنې ته غبرګونونه لا هم دوام لري او په دې لړ کې په افغانستان کې د ملګرو ملتونو سیاسي استازولۍ د يادې چاودنې عاملانو ته د سزا ورکولو غوښتنه کړې.
یادې استازولۍ زیاته کړې:« د کابل په دشت برچی سیمه کې د وړمی شپې په چاونه کې د اهل تشيع لږ تر لږه ۲۵ تنه وژل شوي او ټپیان شوي دي. یوناما پر ملکي وګړو د هدفي بریدونو د پای ته رسولو او د افغانستان د اهل تشيع د پراخ خوندیتوب او له عاملینو سره يې حساب کولو غوښتنه کوي.»
د پوځي چارو کارپوه محمدمتین محمدخېل وايي: « اساسي خبره دا ده چې اسلامي امارت باید تر پخوا په دغه شیعه مېشتو سیمو کې استخباراتي څار زیات کړي، امنیتي پوستې جوړې کړي، هلته نور کسان وګوماري، ترڅو د دغسې ناوړه پېښو مخه ونیول شي.»
د کورنیوچارو وزارت چارواکی بیا وایي، دا چی یادو جنګي ډلو په ولایتونو کی ماتې خوړلې او ځپل شوي؛ اوس هڅه کوي چي په پلازمېنه کابل کی چاودنې وکړي او د خلکو ذهنونه خراب کړي.
دوی ډاډ ورکوي چې د کابل ښار د نورو سیمو په ګډون به د شیعه مېشتو سیمو ته ځانګړې پاملرنه وکړي او امنیت به یې ټینګ کړي.
د کورنیو چارو وزارت ویاند عبدالمتین قانع وايي: « ان شاءالله اسلامي امارت به بیا هم په دې کې خپله بشپړه هڅه کوي چې په زیانمنو سیمو کې امنیت لا ښه تامین کړي او په راتلونکې کې ان شاءالله د دا ډول پېښو مخه ونیسو؛ خو د پولیسو دنده دا ده چې مجرمین پر وخت ونیسي او د اسلامي شریعت پر بنسټ یې محاکمه کړي؛ نو ډېرې داسې پېښې دي چې اسلامي امارت یې الحمدالله مخه نیولې او نیسي به یې.»
واک ته د اسلامي امارت له رسیدو وروسته په افغانستان کې د ډېرو بریدونو او چاودنو مسوولیت د داعش خراسان ډلی منلی دی او حکومت یې هم پړه پر دوی اچولې، خو له دې ټولو سره- سره حکومت ادعا کوي چې داعش ډله د افغانستان لپاره لوی ګواښ نه دی او ځپل شوې.
