د افغانستان په تړاو د ملګرو ملتونو امنیت شورا له لوري تصویب شوی وروستی پریکړه لیک او د قزاقستان دریځ هغه فرصتونه دي چې ترې د ګټې اخېستنې په صورت کې افغانان له اوسني وضعیت ژغوري.
د سیاسي چارو کارپوهان وايي، د نړیوال مشروعیت د نه درلودو او د لګېدلو بندیزونو له امله د هرې ورځې په تیرېدو سره په افغانستان کې د بشري بحران لمن پراخه کېږي.
دوی وايي، له دې وروسته باید هېڅ فرصت له لاسه ورنه کړل شي او د افغانانو اسلامي او ملي ارزښتنو په چوکاټ کې ترې ګټه واخېستل شي.
د کارپوهانو په باور اوسنیو شرایطو کې د افغانستان ملي ګټې دا ایجابوي چې له اسلامي نړۍ ، سیمې او نړیوالې ټولنې سره رسمي اړیکې ټینګې شي.
د سیاسی چارو کارپوه نجیب الله جامع وايي: « د افغانستان د څو اړخیزه، سنتي او دودیز سیاست غوښتنه دا ده چې نه یوازې موږ له سیمې، سترو سازمانونو او له غرب او شرق سره نږدې اړیکې ولرو، بلکې د اسلامي نړۍ ظرفیت؛ هغه که له اقتصادي، سیاسي او که له علمي او فرهنګي اړخه دی، له دې ټولو ګټه اخېستل هم ډېر اړین دي.»
کارپوهان وايي، رسمیت پيژندنه نه یوازې پر حکومتونو د خپلو ولسونو باور زیاتوي بلکې د هېوادونو امنیت هم په دایمي ثبات بدلوي.
دوی وايي، په کار ده چې د نظام دبقا لپاره له شته فرصتونو ګټه واخېستل شي او افغانستان یو ځل بیا په نړیوالو سټیجونو کې خپل ځای ځایګی پیدا کړي.
د پوهنتون استاد فیض محمد ځلاند وايي: « په رسمیت پېژندل د دولتونو تر ټولو مهم لومړیتوب دی، ځکه له نړیوال رسمیت پېژندلو سره نه یوازې د دولتونو مشروعیت تړلی، بلکې د دولتونو راکړه ورکړه، له نړۍ سره د دوی سیاسي او اقتصادي تعاملات او په کوردننه د ولس د باور جوړونې په برخه کې پرمختګونه او په ټوله کې پر ثبات د امنیت بدلېدو کې ډېرمهم کردار لوبوي.»
ځینې نور بیا وايي، له تیرو شاوخوا دوه نیمو کلونو راهیسې نړیوالو بندیزونو په افغانستان کې بشري وضعیت ناسم لور ته روان کړی او اوس افغانستان د نړۍ بشري مرستو ته اړتیا لري خو د دغو مرستو راجلبول او د بندیزونو له منځه وړل د رسمي اړیکو ټینګښت له لارې ممکن دي.
د سیاسي چارو کارپوه نجیب الرحمان شمال وایي: « د تجربو او تېرو څو میاشتو پېښو ته په کتو د اوسني سرپرست حکومت بهرنی سیاست ډېر اغېزناک نه و او په حقیقت کې له نړیوالې ټولنې سره په مقابل کې ولاړ دی، چې په دې ډول بشري، ټولنیز او سیاسي ناورین لا زیات شوی، حال دا چې افغانستان په یوازې توګه د دغه ډول ستونزو او بشري ناورینونو سره مبارزه نه شي کولی او موږ له پخوا زیات اوس د نړیوالې ټولنې ملاتړ او لا زیاتو خدمتونو وړاندې کولو ته اړتیا لرو.»
په ټوله کې باور دادی چې ۲۰۲۴ کال به په نړیواله کچه د افغانستان لپاره له ننګونو او فرصتونو ډک وي خو که چیرې په غوره شویو ځينو سیاستونو کې بدلون راشي، ورسره به تر ډېره د افغانستان شته ستونزې حل شي.
د سیاسي چارو کارپوه محمد جان رسولیار وايي: « ۲۰۲۴ کال کې به افغانستان له فرصتونو او ننګونو سره مخ وي. فرصتونه په دې معنی که چېرې د افغانستان موجوده حکومت وکولی شي په خپلو سیاستونو کې څه نا څه مثبت بدلون راوړي؛ نو له موجوده انزوا به را بهر شي، د نړیوالې ټولنې برخه به شي او هغه ستونزې او ننګونې چې اوس د افغانستان حکومت ته متوجې دي هغه به له منځه لاړې شي.»
د ملګرو ملتون امنیت شورا له لوري افغانستان سره د تعامل څرنګوالي په تړاو دپریکړه لیک تصویب او د قزاقستان له لوري د تورلېسته د اسلامي امارت د واېستلو تصمیم هغه شنه څراغونه دي چې کتونکي یې د افغانستان د رسمیت پیژندنې لپاره د ښه فرصت په توګه یادوي.
