د امریکا بهرنیو چارو وزارت ویاند متیس میلر په افغانستان کې د امریکايي بندیانو په اړه په یوه خبري ناسته کې ویلي، چې واشنګټن به د هغوی د خلاصون لپاره خپلو فشارونو ته دوام ورکړي.
میلر ویلي، امریکايي چارواکو د اسلامي امارت له پلاوي سره په لیدنه کې د امریکايي بندیانو، د الوتنو پر بیا پیلولو، له نشه يي توکو او ترهګرۍ سره پر مبارزې خبرې کړې دي.
میلر زیاتوي، اسلامي امارت په وار وار د مشروعیت غوښتنه کړې، خو په وینا یې له خلکو سره د هغوی د چلن او د بشري حقونو د ښکاره سرغړونو په ګډون د بېلابېلو دلایلو له امله دوی په رسمیت نه دي پېژندل شوي.
دغه راز د امریکا بهرنیو چارو وزارت ویاند ویلي، پر اسلامي امارت لګول شوي بندیزونه پر خپل ځای دي.
اسلامي امارت تازه په دې تړاو څه نه دي ویلي، خو له دې وړاندې یې په وار وار ویلي، چې د نشه یي توکو کښت صفر شوی، په افغانستان کې هېڅ وسله واله ډله شتون نه لري او د رسمیت پېژندنې لپاره یې ټول شرایط پوره کړي دي.
