د بهرنیو چارو وزارت سرپرست مولوي امیر خان متقي د چهارشنبې پر ورځ د «۱۴۰۲ کال د چنګاښ پر ۲۸ مه» په کابل کې د افغانستان لپاره د پاکستان ځانګړي استازي اصف علي دراني سره کتلي دي.
په دې کتنه کې متقي د افغانستان لپاره د پاکستان ځانګړي استازي ته د نوي مسوولیت د مبارکۍ ترڅنګ هېله څرګنده کړې، چې د دواړو هېوادونو ترمنځ سیاسي او اقتصادي اړیکې لا پراختیا ومومي او د دې لپاره ګډ کار ته اړتیا ده.
د متقي په وینا په افغانستان کې د امنیت په راتلو سره ښه فرصت برابر شوی چي د دواړو هېوادونو اقتصاد وغوړیږي، لویې پروژې پیل او سوداګري زیاته شي.
امیر خان متقي د امنیتي همکاریو په تړاو ویلي، چې د افغانستان خاوره به د هېڅ هېواد پر ضد ونه کارول شي او هڅه کوي چې په سیمه کې امنیت او ثبات راشي.
په دې ناسته کې اصف علي دراني بیا ویلي، هڅه به یې دا وي چې د دواړو هېوادونو تر منځ اړیکې لا پیاوړې او پراخه شي او په وینا یې دواړه لوري په تجارتی برخه کې پرمختګونه لري، چې د ستاینې وړ دي او د سیمې امنیت د ټولو پرګټه دی، چې په دې برخه کې به دواړه خواوې همکاري کوي.
دراني ویلي، چمتو دي، چې په سیاسي، اقتصادی او نورو برخو کې دوه اړخیز میکانیزمونه جوړ او پلي کړي، چې په وینا یې د تورخم – جلال آباد سړک د رغولو پاتې کار ته به جدی پاملرنه وکړي.
نوموړي افغانانو ته د ویزو په برخه کې او په ځانګړې توګه د ناروغانو لپاره اسانتیاوې رامنځته کړي.
لېدنه کې مولوي امیر خان متقي په پاکستان کې د افغان بندیانو او د افغان سوداګرو د مالونو د ځنډېدو ستونزو د حل هم غوښتنه وکړه چې د همکارۍ ډاډ ورکړل شوی دی.
