د ملګرو ملتونو د بشري مرستو همغږي کوونکې ادارې (اوچا) په یوه راپور کې ویلي، د خوړو نړیوال پروګرام د بودیجې له کمښت سره مخ دی او له میلیونونه افغانانو سره يې مرستې بندې کړي.
د راپور یوه برخه:« د بودیجې نشتوالي له امله د خوړو نړیوال پروګرام اړ دی له ۸ میلیونه افغانانو سره، چې کافي خواړه یې نه درلودل خپلې مرستې بندې کړي. د دې ترڅنګ ۱.۴ میلیونه هغه میندې او ماشومان به له خوړو بې برخې شي، چې د خوارځواکۍ د مخنیوي لپاره ورسره مرستې کیدې. له جولای میاشتې وروسته د ۱۵ میلیونه کسانو له ډلې یوازې ۵ میلیونه یې بیړنۍ مرستې تر لاسه کولی شي.»
په راپور کې د خوراکي توکو په برخه کې د مرستو کمېدو ترڅنګ ویل شوي، چې ښايي په دې لړ کې د افغانستان روغتيايي سکټور هم زيانمن شي او په پایله کې به يې نږدې ۸ میلیونه افغانان، له روغتیایي مرستو محروم شي.
د راپور یوه برخه:« د روغتیا برخه کې اټکل کېږي، که چیرې د تموېل کچه په اوسني حال پاتې شي نو ۷.۶ میلیونه خلک به د ژوند ژغورنې اړینو روغتیایي مرستو ته لاسرسی ونه لري. د بودیجې د کمښت له امله څلورو ولایتونو کې ۲۵ ګرځندویه روغتيایي مرکزونه تړل شوي، چې له امله یې ۱۰۰ زره کسان لومړنیو روغتیايي خدمتونو او د خوارځواکۍ په برخه کې له مرستو محروم شوي.»
د اوچا په راپور کې ویل شوي، افغانستان په روان ۲۰۲۳ کال کې هم د نړۍ د بحران ځپلو هېوادونو یو دی چې په هرو درېیو کسانو کې دوه هغه یې بشري مرستو ته اړتیا لري.
راپور کې وړاندې ویل شوي دي چې د اړمنو کسانو ۷۷ سلنه هغه ښځې او ماشومان دي.
د راپور یوه برخه:« افغانستان اوس هم د نړۍ د بحران ځپلو هېوادونو له ډلې دی، چې په ۲۰۲۳ کال کې د نفوس دوه پر درېیمه برخه یې بېړنیو بشري مرستو ته اړتیا لري. ښځې او ماشومان د محدودیتونو د زیاتوالي له امله تر ټول زیات بحران ځپلي چې د اړمنو کسانو ۷۷ سلنه برخه جوړوي.»
له دې وړاندې د خوړو نړیوال پروګرام هم ویلي ول چې شااوخوا ۲۸ میلیونه افغانان بشري مرستو ته اړتیا لري، خو په خبره يې دا اداره يوازې ۱۵ میلیونه هغو ته مرستې رسولی شي.
خو دا کچه د بوديجې د کمښت له امله په اوس کې ۵ ميليونه کسانو ته راښکته شوې ده.
