په داسې حال کې، چې ځينو هېوادونو د افغانستان له سرپرست حکومت سره د تعامل لپاره يو لړ شرايط وړاندې کړي، خو بریټانیا د اوسني حکومت په شمول له ټولو اړخو سره د ګډ کار ډاډ ورکړی دی.
د افغانستان لپاره د بریټانیا شارژادافېر رابرټ ډیکسن وايي له ګډ کار يې موخه په افغانستان کې د سولې او ثبات ټېنګښت دی.
خو د دې ډاډ ترڅنګ يې پر سرپرست حکومت د فشارونو د دوام خبر هم ورکړی او زياته کړې يې ده، چې دا فشارونه به د افغان نجونو او مېرمنو د حقونو تحقق په موخه دوام وکړي.
ډيکسن زیاته کړې:« موږ به د افغان ښځو او نجونو اړوند خپل فشار ته دوام ورکړو تر څو دوی خپل بشپړ توان ته ورسیږي او له هر چا سره، د طالبانو په ګډون به د یو پر امنه او سوکاله افغانستان لپاره کار کوو.»
ډیکسن افغانستان ته خپل وروستی سفر ګټور بللی او وايي، ياد سفر يې له افغانستان څخه د بریټانیا ملاتړ ته ژمنتيا څرګندوي.
بریټانیا که څه له افغانستان سره د ۶۵۰ ميليونه ډالرو په ارزښت د بشري مرستو خبر ورکړی، خو ډیکسن يې لا هم په افغانستان کې بشري وضعيت ناسم بولي.
د ډیکسن په خبره، ياد بشري وضعيت د نيمې پېړۍ پر جګړو سربېره، د وچکالۍ او نورو عواملو له کبله نور هم سخت شوی دی.
هغه زیاته کړې:« افغانستان لا هم د نړۍ تر ټولو ناوړه بشري بحران زغمي. کوم چې د نیمې پیړۍ شخړو او وچکالۍ څرګندونه کوي، چې د اقلیم د بدلون له امله نور هم بحراني شوی. له ۲۸ میلیونو څخه ډېر افغانان بشري مرستو ته اړتیا لري او اقتصادي وضعیت یې هم خراب او ناڅرګنده ښکاري.»
د سیاسي چارو شنونکي بيا په افغانستان کې بشري وضعيت ته په پام سره د نړيوالو او په ځانګړې توګه د بریټانیا د مرستو پر دوامداره کېدو ټينګار کوي.
دوی وايي، د يادو مرستو د دوامداره کېدو په موخه اړتيا ده چې سرپرست حکومت د نجونو د زدهکړو او د مېرمنو پر کار کولو د بنديزونو په اړه پر شویو پرېکړو له سره غور وکړي.
دا په داسې حال کې ده چې راتلونکې مياشت په افغانستان کې د اسلامي امارت د واکمنېدو دوه کاله پوره کېږي، خو د يادې مودې په تېریدو سربېره هم، د نجونو د زدهکړو او په ادارو کې د مېرمنو د کار کولو طرحه لا هم نه ده چمتو شوې.
