وروسته له هغې چې پنټاګون او د امریکا د بهرنیو چارو وزارت د افغان جګړې د خصوصي کولو په تړاو هر ډول خبرې کول رد کړل، ورسره سم د ملي امنیت شورا د سلاکار دفتر اعلامیه خپره کړه او په دې پسې ولسمشر محمد اشرف غني په بلخ کې د جګړې د خصوصي کولو په اړه کلک مخالفت وښود.
اوس چې د جګړې د خصوصي کولو او بلک واټر امنیتي کمپنۍ ته د سپارلو موضوع توده ده، تراوسه افغان حکومت په دې تړاو غلی و، خو کله چې د بلک واټر کمپنۍ مسوول کابل ته راغلی و او دلته یې له ځینو پخوانیو او اوسنیو چارواکو سره لیدنې کړې وې، دا انديښنې لا زیاتې شوې چې ګنې امریکا غواړي جګړه خصوصي امنیتي کمپنۍ ته وسپاري.
بلک واټر امنیتي کمپینۍ ته د عراق جګړه هم سپارل شوې وه چې له زیاتو ننګونو سره مخ شوه او عراق کې یې زیات خلک بې ګنا ووژل او بلاخره یې امریکايي ځواکونه اړ شول چې هلته پوځي ماموریت پای ته ورسوي.
اوس چې د افغانستان جګړه د ناسم مدیریت له کبله سخته شوې، امریکا غواړي چې د دې جګړې په نورو اړخونو فکر وکړي یو اړخ یې د جګړې خصوصي کول دي.
افغان حکومت په دې ښکاره اعتراف نه دی کړی چې د جګړې مدیریت یې ناسم دی چې له کبله یې د افغان سرتېرو مرګ ژوبله لوړه شوې او زیاتو سیمو باندې د طالبانو ولکه راغلې ده.
ولسمشر محمد اشرف غني چې د اعلی پوځ سرقومندان دی، د جګړې په تړاو داسې کارنده پالیسې رامنځ ته نه کړه چې جګړه کمه او یا مخالف لوری کمزوری کړي، بلکې برعکس جګړه زیاته شوه او مقابل لوري د افغان حکومت له خالیګاوو ګټه پورته کړه او ځان یې پياوړی ثابت کړ.
د کندز دوه ځله سقوط، د فراه سقوط، د غزني سقوط او د ارزګان، زابل او هلمند د مرکزونو کلابندي چې مرکز ترینکوټ له دوه نیم کالو راهیسې محاصره دی، خو دا چې د جګړې لپاره سمه قومنده نشته، افغان ځواکونه قرباني ورکوي، خو هیڅ نتیجه نه ورکوي.
له دې ټولو سره ـ سره افغان ولسمشر په احساساتي ویناوو کې په خلکو احسان کوي چې ګنې ۱۰۰۰ کلونو کې به هم د جګړې د خصوصي کولو پریکړه و نه کړي او نه به افغان جګړه خصوصي کمپنۍ ته وسپاري.
ولسمشر محمد اشرف غني ته د جګړې له خصوصي کولو سره مخالفت هم لاس ته راوړنه ښکاري، د جګړې له خصوصي کولو سره مخالفت باتوري نه ده، بلکې د جګړې مدیریت او د جګړې ختمول باتوري ده چې اوسنی حکومت پکې سل په سلو ناکام دی.
سراعلی قومندان ډیر زیات ټینګار په هوایي بریدونو کوي چې ګنې اغیزمن دي، خو د دې بریدونو له کبله یواځې په تېره میاشت کې ، په کندز، میدان وردګ، کاپیسا، لوګر او کندهار ولایتونو کې لسګونه ملکي وګړي شهیدان شوي او ټپيان شوي دي.
ولسمشر چې ډیره کله په سر اعلی قومندانۍ افتخار کوي او بار ـ بار یې یادوي، هیڅکله یې د بهرنیو ځواکونو هغه بریدونه و نه غندل چې ملکي وګړي پکې قرباني ورکوي.
د افغانانو لومړیتوب د جګړې ختمول او د سولې راوستل دي، خو اوسني حکومت افغانان دې ارمان ته و نه رسول، یو لامل دا دی چې د ملي یووالي حکومت په بهرني سیاست کې توازن و نه ساته او اوس ویره شته چې د امریکا او روسيې ټکر په افغانستان کې رامنځ ته شې.
د ملي امنیت شورا مخکینی سلاکار حنیف اتمر د امریکا، چین او روسیې سره په اړیکو کې د توازن ساتلو لپاره هڅه کوله چې بالاخره یې له روسیې سره په اړیکو او همکاریو تورن کړ او فشار یې پرې راوړ چې استعفا ته مجبور شو.
ښاغلی اتمر پوهیده چې افغانستان کې که سیاستونو کې توازن رامنځ ته نه شي، ممکن روسیه او امریکا سره ټکر کې واقع شي چې زیان به یې افغانستان او افغانانو ته وي.
د چهارشنبې په ورځ په یوې ناسته کې د بهرنیو چارو وزارت سیاسي مرستیال حکمت خلیل کرزي اعتراف وکړ چې افغانستان د امریکا او روسیې ترمنځ د سیاسي رقابت ډګر ګرځیدلی او که دا لړۍ دوام پیدا کړي عواقب به یې ګران وي.
روسیه په افغانستان کې له داعش انديښمنه ده او د طالبانو د ملاتړ تور دی پرې، امریکا بیا د داعش په ملاتړ تورنه ده او دواړو اړخونو کې قرباني افغانان ورکوي.
اوس که د جګړې او سیاستونو لپاره سم مدیریت رامنځ ته شي او به بهرنیو اړیکو کې توازن وساتل شي، نږدې ده چې نیابتي جګړه کمه او د افغانانو د قربانۍ درنه لړۍ ودریږي چې په جګړه کې یې ورکوي، هغه جګړه چې د افغانانو نه ده، خو قرباني یې ورکوي.
سیما شاکر
یادښت: لیکنه د لیکوال خپل نظر دی، شمشاد په دې برخه کې بې پرې دی
