عامې روغتيا وزارت د ګوزڼ ختمولو لپاره د ځينو وزارتونو استازي د همغږۍ رامنځته کولو لپاره راغوښتي او غواړي د همدې رامنځته کېدونکې همغږۍ پر بنسټ د ګوزڼ ضد هڅې چټکې کړي.
د عامې روغتيا وزير دا هڅې له دې امله چټکول غواړي چې په خبره يې، لا هم د ځينو ولايتونو په لرې پرتو سيمو کې ماشومان د ګوزڼ ضد څاڅکي نه شي ترلاسه کولی.
نوموړی له وزارتونو سره پر همغږۍ سربېره، له ګوزڼ سره په مبارزې کې له ټولو دولتي کارکوونکو، قومي مشرانو او ديني عالمانو هم مرسته غواړي.
د عامي ورغتیا وزیر نورجلال جلالي وايي: « سره له بریاوو، موږ لاهم له یو شمېر ننګونو سره مخ یو. په جنوبي او سوېل ختیځو حوزو او په ځانګړي ډول کندهار، هلمند او پکتیکا کې د پولیو د انساني پېښو دوام موږ ته یادونه کوي چې لاهم داسې ماشومان شته چې بشپړ واکسین ته لاسرسی نه لري.»
جلالي دا نه په ډاګه کوي چې ولې په ځينو ولايتونو کې ماشومان د ګوزڼ ضد واکسين ته لاسرسی نه لري، خو اعتراف کوي چې ځينې کسان لا هم شته چې په لرې پرتو سيمو کې د ياد واکسين د کمپاينونو په اړه خلکو ته غلط ذهنيت ورکوي.
نوموړی د يادې پديدې په ختمولو کې د نړيوالو سازمانونو همکاري حياتي بولي او غوښتنه کوي چې د ګډو هڅو په پايله کې ګوزڼ بايد صفر شي.
د عامې ورغتیا وزیر زیاتوي: « داسې موارد هم شته چې کورنۍ د بېلابېلو عواملو له امله، خپل ماشومان د واکسین ځایونو ته نه راولي. همدارنګه په ځینو ښوونځیو او مدرسو کې ټیمونه محدود شوي او ځینې ملاامان د واکسین مخالفت کوي. کله نا کله د کليو مشران او مخور کسان هم د پولیو واکسین ملاتړ نه کوي.»
د عامې روغتيا وزارت د معلوماتو له مخې، په ختيځو ولايتونو کې د ګوزڼ مثبتې پېښې صفر شوې دي، خو په کندهار، هلمند او پکتيکا کې لا هم په دې ويروس د ماشومانو اخته کېدو خطر شته دی.
