د هلمند ولایت محلي چارواکي وايي، د ولایت اړوند بېلابېلو سیمو کې د ۵۲ پروژو په پلي کولو سره یې سلګونه زره بېوزله کورنیو ته مرستې رسولې دي او په زرګونو کسانو ته یې د کار زمینه برابره کړې.
چارواکي دغه راز وايي، دا ۵۲ پروژې د بېلابېلو موسسو له خوا د ۳ میلیارده او ۲۸۷ میلیونه افغانیو په ارزښت تطبیق شوې دي.
د هلمند اقتصاد ریاست چارواکي وایي، د یادو پروژو له لارې ۱۹۷زره بې روزګاره کسانو سره مرستې شوې چې له ډلې یې نږدې ۵۷ زره کسانو ته د کار په بدل کې نغدې پیسې ورکړل شوې دي.
منیراحمد زغم زیاتوي، په دغو پروژو کې شاوخوا ۲۸ زره کسانو ته د کار کولو فرصتونه برابر شوي او د روغتیا په برخه کې نږدې ۲ میلیونه کسانو ته خدمات وړاندې شوي دي.
د هلمند اقتصاد ریاست مرستیال منیر احمد زغم وايي: « په هلمند ولایت کې په ۱۴۰۴ کال د موسسو له خوا ۵۲ پروژې تطبیق شوې دي. پر دغو پروژو ۴۸ میلیونه ۳۴۱ زره ۵۷۰ امریکايي ډالر لګول شوي. د دغو پیسو معادل په افغانیو ۳ میلیارده ۲۸۷ میلیونه، ۲۲۶ زره ۷۶۰ افغانۍ کېږي.»
د نوموړي په خبره، په همدې موده کې د ولایتي ادارې له لوري هم ۷۷ پروژې وړاندیز شوې وې چې له ډلې یې ۱۷ پروژې منظور شوې دي.
مسوولین دغه راز وایي، د یادو نږدې ټولو پروژو کارونه روان دي او یو شمېر یې بشپړې شوې هم دي.
منیر احمد زغم وړاندې وايي: « په دغو پروژو کې ۱۹۷ زره ۸۹۶ کسانو ته مرستې رسېدلې دي او همدارنګه ۲۷ زره ۹۸۳ کسانو ته په کې د کار زمینه برابره شوې وه. همدارنګه د روغتیا په برخه کې د ۱ میلیون ۹۶۲ زره ۲۶ تنو ناروغانو درملنه شوې.»
بله خوا، که څه هم د هلمند اوسېدونکي د دغو پروژو هرکلی کوي، خو ټینګار هم کوي چې لا هم په دې ولایت کې د بنسټیزو پروژو تطبیق ته جدي اړتیا ده.
دوی د ځوانانو لپاره د لا زیاتو کاري فرصتونو برابرولو، د کرنې سکټور پیاوړتیا او د وچکالۍ پر وړاندې مبارزې لپاره د اوبو بندونو جوړولو غوښتنه کوي.
د هلمند اوسېدونکی صالح محمد وايي: « د تېر په پرتله په دې پروژو کې ډېرو خلکو ته کار پیدا شوی. له دولت غوښتنه کوو چې د دې پروژو کچه نوره هم پراخه کړي، ترڅو لا ډېرو کسانو ته د کار زمینه برابره شي.»
د هلمند اوسېدونکی عبدالولي وايي: « دا چې له تېرو څو کلنو راهیسې هلمند ولایت وچکالۍ او جګړو ځپلی دی، که لا ډېرې پروژې پلې شي او دغه راز کوچني بندونه جوړ شي، دا به ډېر ښه شي.»
د دغو پروژو د پلي کولو خبره داسې مهال کېږي چې د دې ولایت اوسېدونکي بیا دا باور څرګندوي چې د تلپاتې ودې، کرنې پیاوړتیا او د وچکالۍ اغېزو کمولو لپاره لاډېرو بنسټیزو پروژو ته اړتیا ده.
