په مزار شریف کې د خطاطۍ او انځورګرۍ درې ورځنی نندارتون چې د بلخ اطلاعاتو او فرهنګ ریاست په همغږۍ پرانستل شوی، په کې شاوخوا ۱۴۰ هنري اثار نندارې ته وړاندې شوي دي.
د نندارتون جوړونکي وايي، دا ډول هنري نندارتونونه د ځوانو استعدادونو د ودې لپاره مهم دي.
د بلخ خطاطانو ټولنې مشر روح الله رحیمي وايي: « له نېکه مرغه د اطلاعاتو او فرهنګ ریاست په همکارۍ مو وکولی شو ل خپله ټولنه پر پښو ودروو. لکه څرنګه چې تاسو وینئ، د ټولنې د بیارغونې په ویاړ نندارتون هم جوړ شوی او په کې شاوخوا ۱۴۰ آثار نندارې ته اېښودل شوي دي.»
په دې نندارتون کې په ښکلي خط د قرآني آیتونو لیکل شویو لوحو، د جوماتونو او تاریخي ودانیو انځورونو، د بلخ طبیعي منظرو او معاصرو مفهومي آثارو، د لیدونکو پام ځان ته اړولی.
ځینې هنرمندان وایي، هڅه یې کړې د دودیز هنر ترڅنګ، نوې بڼې هم و ازمويي او خپل پیغام د رنګ او کرښې له لارې ټولنې ته وړاندې کړي.
خطاط اقبال ادیب وايي: « زموږ هیله او هڅه دا ده چې دا خپل هنر خلکو ته معرفي کړو، ترڅو نسل په نسل او لاس په لاس تر نورو نسلونو ادامه پيدا کړي. تاسو پوهېږئ چې بلخ تل د ادیبانو او عارفانو ټاټوبی پاتې شوی او موږ هڅه کوو د بلخ دغه تاریخي نوم او ویاړ ژوندی وساتو.»
انځورګر(نقاش) نوید ثاقب وايي: « دا چې موږ په مزارشریف کې له دې وړاندې ټولنه یا انجمن نه درلود او په دې تړاو نندارتونونه هم نه جوړېدل، پرېکړه وشوه چې دا ډول نندارتون جوړ شي او له دې وروسته به هرکله جوړېږي.»
بله خوا، د بلخ اطلاعاتو او فرهنګ ریاست هنر د هنرمندانو او خلکو ترمنځ د اړیکو پیاوړي کولو وسیله بولي او وايي، دا ډول پروګرامونه ځوان نسل هنر ته هڅوي او د فرهنګي ارزښتونو ساتنې احساس پیاوړی کولی شي.
د بلخ اطلاعاتو او فرهنګ رییس مولوي محمودالله ضرار وايي: « دا ښه ابتکارات دي، موږ یې ستاینه کوو او پوره ډاډ ورکوو چې همکاري به یې کوو. دا برخه کولی شي ځوانان تشویق کړي. موږ به هر هغه برخه کې له دوی سره همکار پاتې شو چې اړتیا یې وي.»
د معلوماتو له مخې، سږکال بلخ ولایت کې دا د هنري آثارو لومړی نندارتون دی چې جوړېږي او ټاکل شوې درې ورځې دوام ولري.
