وروسته له هغې چې د پاکستان پوځ لوري د خیبرپښتونخوا په تېرا کې د ترهګرۍ په نوم پوځي عملیات اعلان کړل، ورسره هم مهال له دې سیمې زرګونه کورنۍ اړ ایستل شوې چې خپلې مېنې پرېږدي.
اوس تازه د پاکستان دفاع وزیر ادعا کړې چې په تېرا دره کې هېڅ ډول پوځي عملیات نه دي روان او خلک د واورو له امله کډې کوي.
خواجه اصف په اسلام اباد کې یوې خبري ناستې ته ویلي، د عملیاتو په تړاو څرګندونې یوازې یو اټکل او بې بنسټه اوازې دي.
د پاکستان دفاع وزیر خواجه اصف ویلي: « تاسو پوهېږئ چې په تېرا کې واورې کېږي او هر کال خلک له تیرا څخه د زیاتو واورو ورېدو له امله کډې کوي. د تیرا درې اړوند ټولې چارې د ایالتي حکومت او سیمهییزې جرګې په سلا او مشورې هوارې شوې دي.»
ظاهراً داسې ښکاري چې د پاکستان دفاع وزیر دا څرګندونې د هغو غبرګونونو په ځواب کې کوي چې په دې وروستیو کې د پاکستان پوځي عملیاتو پر وړاندې ولسي خلکو او یو شمېر مخالفو ګوندونو کړې.
خواجه اصف وړاندې وایي، د خیبرپښتونخوا حکومت غواړي خپلې ناکامۍ پر پوځیانو او داسې عملیاتو واچوي چې اصلا وجود نه لري.
هغه دا هم ویلي چې دا مهال د تیرا درې دننه د تحریک طالبان پاکستان(ټيټيپي) شاوخوا ۵۰۰ غړي د خپلو کورنیو سره مېشت دي.
خواجه اصف په دې اړه ویلي: « اوس مهال په تېرا دره کې دننه تحریک طالبان پاکستان یا ټيټيپي ۵۰۰ غړي له خپلو کورنیو سره مېشت دي. په تیرا کې پر شاوخوا ۱۲ زره جریبه ځمکه د چرسو کرکیله کېږي او له هر جریب څخه یې شاوخوا ۳.۵ میلیونه روپۍ عاید ترلاسه کېږي او همدا د شخړې او لانجې اصلي لامل دی.»
تر دې مخکې هم د پاکستان د اطلاعاتو وزیر عطاالله تارړ هم یادونه کړې وه چې په تیرا دره کې د پوځي عملیاتو هېڅ ډول پلان نه شته او نه هم پوځ خلکو ته ویلي چې له سیمې څخه کډې وکړي.
د خېبرپښتونخوا وزیر اعلی سهیل اپریدي دا څرګندونې دوه مخي توب بللی او د پاکستان په پوځ کې یې یو شمېر جنرالان په پښتنو سیمو کې پر کړکېچ تورن کړي.
سهیل اپریدي ویلي، د پاکستان جنرالانو ته د پښتنو وینې تویول، تر اوبو هم ارزانې او اسانې ښکاري.
د خیبرپښتونخوا اعلی وزیر ویلي: « هغوی زموږ وینې ته بیخي د وینې په سترګه نه ګوري. د پښتنو او قبایلو وینې هغوی ته تر اوبو هم ارزانې او اسانې دي. کله چې ۱۴زره استخباراتي چینلونو او ۲۲ لویو عملیاتو وروسته بیا هم امن نه راځي، نو د دې ملامتي پر موږ مه را اچوئ.»
تېرا د خیبرپښتونخوا یوه له هغو غرنیو سیمو ده چې هر کال په کې د ژمي موسم پر مهال سختې واورې کېږي.
هلته ځایي سیاسي فعالان د پاکستان پر پوځ له دې امله هم سختې نیوکې کوي چې په دې سختو واورو کې یې ولسي خلک د خپلو مېنو پرېښودلو ته اړ کړي دي.
د پښتون ژغورنې غورځنګ مشر زبیر شاه اغا وايي: « کله چې پي ټي اېم او نورو نړیوالو ادارو په دې اړه غږ پورته کړ، نو د پاکستان پوځي حکومت له دې منکر شو چې هلته یې پوځي عملیات پلان کړي. دوی دروغ وايي، په جوماتونو کې یې اعلانونه وکړل، د خلکو دروازې یې ورماتې کړې او خبرداری یې ورکاوه چې ژر ترژره له دې سیمې کډه شي.»
د پوځي چارو څارونکي بیا په دې باور دي چې د پاکستان پوځ په پښتني سیمو کې غواړي ټول ګران بیه کانونه ولوټي او ورسره هممهاله د لوېدیځ په اشارې هلته د ترهګرۍ په نوم پوځي عملیات پر مخ یوسي.
د پوځي چارو شنونکی اخترمحمد راسخ وايي: « د دوی یو له اساسي پلانونو دا دی چې له ډیورنډ کرښې سره نږدې معدنیات دي، خوږې اوبه او ځنګلونه دي، دلته باید پنجابیانو ته د ژوند شرایط مساعد کړي. همدارنګه دوی غواړي په تیرا کې نظامي اډې جوړې کړي او بیا له هغه ځایه افغانستان، منځنۍ اسیا او چین ته سرخوږی جوړ کړي.»
د یادولو ده چې د خیبرپښتونخوا په تېرا کې د پاکستان پوځ د عملیاتو له کبله زرګونه کورنۍ اړې شوې چې خپلې مېنې پرېږدي او نورو ځایونه ته کډه شي.
په دې ترڅ کې ولسي خلک له سختو ننګونو او ستونزو سره مخ شوي او اوس د خیبرپښتونخوا حکومت اعلان کړی چې د خیبرټولو مېشتو قومونو ستره جرګه به د راتلونکې یکشنبې په ورځ راوبلل شي.
