د ترکيې او قطر په منځګړيتوب د افغانستان او پاکستان ترمنځ د وروستيو خبرو اترو او مذاکراتو له ناکامېدو وروسته، تازه راپورونه ورکړل شوي چې د سعودي عربستان په منځګړيتوب د خبرو لپاره د دواړو هېوادونو مرکچيان رياض ته رسېدلي.
د راپورونو له مخې، د افغانستان پلاوي مشري د اسلامي امارت مهم غړی حافظ انس حقاني کوي او په ترکيب کې يې د کورنيو چارو وزارت معين رحمتالله نجيب او دغه راز د بهرنيو چارو وزارت وياند عبدالقهار بلخي هم شامل دي.
د افغانستان حکومت سعودي عربستان ته د پلاوي سفر نه دی تایيد کړی، خو ردوي يې هم نه. بله خوا، پاکستاني رسنيو د سرچينو له قوله ويلي، د دې هېواد مرکچي پلاوی سعودي عربستان ته رسېدلی او هلته يې له افغان پلاوي سره خبرې هم کړې.
د رسنیو په راپور کې زیاته شوې: « د سعودي عربستان په منځګړیتوب د پاکستان او افغانستان د پلاویو ترمنځ ناسته پای ته رسېدلې او پلاوي بېرته ستانه شوي دي. د پرمختګ په صورت کې به يې د دواړو هېوادونو رسنۍ په اړه خبرې کړای شي.»
شنونکي هم د خبرو له لارې د ستونزو د حل پلويان دي، خو دا مهمه بولي چې که پاکستان د افغانستان پر وړاندې خپله تګلاره چې په خبره يې، پر يو اړخيزو ګټو ولاړه ده بدله نه کړي، ښايي ډېر کله مذاکرات پايله ورنه کړي.
د پوځي چارو شنونکی توریالی ځاځی وايي: « که پاکستان له افغانستان سره ښې اړیکې غواړي، باید له خپلو جنایت کاره پالیسیو تېر شي. عربي هېوادونو افغانستان ته هېڅ هم نه دي کړی، ځکه نو ویلی شم چې د عربستان غونډه به هم د قطر او ترکیې په څېر ښه پایله ونه لري.»
د پوځي چارو شنونکی اختر محمد راسخ وايي: « پاکستان د خپل ولس سترګو ته خاورې شني او نړۍ ته داسې ښيي چې پاکستان له ترهګرۍ سره لاس په ګرېوان دی، حال دا چې پاکستان د ترورېزم قرباني نه بلکې پالونکی دی.»
ځينې نور په مذاکراتو کې د افغانستان دريځ عادلانه بولي او له همدې امله غوښتنه کوي چې له پاکستان سره هر ډول مذاکرات بايد د بندو دروازو پر ځای په سپين ميدان وي.
د نړيوالو اړیکو شنونکی واحد فقیري وايي: « افغانستان باید له پاکستان سره په دې اړه پټو خبرو ته حاضر نه شي، ځکه چې د افغانستان دریځ عادلانه او د پاکستان دريځ ظالمانه دی. که افغانستان پاکستان شفافو او ښکاره خبرو ته راکش کړي، دا به پر پاکستان د کورني او بهرني فشار زیاتېدو سبب شي؛ ځکه د پاکستان ظالمانه موقف به څرګند او خلک پرې خبر شي.»
افغانستان او پاکستان ترمنځ ترينګلتيا په کابل او پکتيکا کې د ياد هېواد له هوايي بريدونو وروسته زياته شوه او دا څه د دې سبب شول چې افغان ځواکونو يې فرضي کرښې ته څېرمه پر پوځيانو د غچ اخيستنې خونړي بريدونه وکړي.
د دې ترینګلتيا کمولو او د ستونزې حل لپاره قطر او ترکيې په ګډه د افغانستان او پاکستان ترمنځ د مذاکراتو درېيو پړاوونو منځګړيتوب وکړ، خو له دې امله يې نتيجه ورنه کړه چې پاکستاني لوري په کې غير معقولې او غير عملي غوښتنې کولې.
