په کابل کې د ملګرو ملتونو سیاسي دفتر (یوناما) پر افغانستان د پاکستان پوځي رژیم وروستيو بریدونو ته چې په کې ښځې او ماشومان شهیدان شول، توند غبرګون ښودلی.
یوناما ویلي، د پاکستان دغه بریدونه د ټولو نړیوالو قوانینو خلاف عمل دی او پاکستان باید نړیوالو قوانینو ته په جدي توګه پام وکړي.
په دې اړه د یوناما په اعلامیه کې راغلي: « د افغانستان په درېيو ولایتونو خوست، پکتیکا او کونړ هوایي بریدونو لږ تر لږه د ۱۰ ولسي وګړو ژوند اخیستی او ۶ کسان نور ټپیان دي. په دې قربانیانو کې اکثریت یې ماشومان دي. یوناما یو ځل بیا په مقابل اړخ غږ کوي چې نړیوالو قوانینو ته جدي پام وکړي او ولسي خلکو ژوند ته زیان ونه رسوي.»
د افغانستان لپاره د ملګرو ملتونو ځانګړي راپور ورکوونکي ریچارډ بېنېټ هم دا غږ بدرګه کړی او ویلي یې دي چې پاکستان باید نړیوالو قوانینو او د ولسي خلکو ژوند خونديتوب ته جدي پام وکړي.
ريچارډ بېنېټ زیاته کړې، پاکستان باید نړیوالو قوانینو او د عامو خلکو ژوند ته پام وکړي او له افغانستان سره خپلې ستونزې د بريدونو پر ځای، د خبرو له لارې حل کړي.
د ملګرو ملتونو ځانګړي راپور ورکوونکی دغه راز ویلي: « د یوناما له خوا دا خبر تکرارول چې نړیوالو قوانینو ته باید جدي پام وشي، څو د ولسي خلکو ژوند وژغورل شي، یوه مهمه اړتیا او غوښتنه ده. پاکستان او افغانستان باید د خبرو مېز ته راوګرځي. ستونزې باید په تاوتریخوالي حل نه شي.»
شنونکي هم د پاکستان پوځي رژيم له لوري شوي بريدونه د توجیه وړ نه بولي بلکې جنايت یې بولي او بشري حقونو له نړيوالو مدافع بنسټونو او اسلامي هېوادونو غواړي چې د پاکستان د ورته جنايتونو مخنيوی وکړي.
د سیاسي چارو شنونکی نجیبالله جامع وايي: « د افغانستان پر خاوره د پاکستان وروستي بریدونه تر ټولو ناوړه ترهګري ده. دا برید د نړیوالو اصولو، منشور او قوانینو له پلوه د غندلو وړ او سرغړونه ده. نړیواله ټولنه، د نړۍ ستر هېوادونه او اسلامي هېوادونه مسوولیت لري چې پاکستان په سیمه کې له نا امنیو خپرولو او د کرايي ماموریت له سرته رسولو را وګرځوي.»
د پاکستان پوځي رژیم د نومبر په ۲۵مه د شپې پرمهال په خوست، پکتیکا او کونړ کې د ملکي وګړو پر کورونو هوايي بریدونه وکړل او له امله يې عام افغانان چې ښځې او ماشومان په کې شامل دي شهیدان شول. له بریدو څو شیبې وروسته اسلامي امارت په خپل غبرګون کې وویل چې د پاکستان پوځي رژیم دا برید به بې ځوابه پاتې نه شي.
