د بغلان ولایت ډنډغوري ولسوالۍ ګوهرګان سیمه کې د هغه لومړني ښوونځي د بنسټ ډبره کېښودل شوه چې لګښت یې ولسي خلکو پرغاړه اخیستی.
دا ښوونځی چې د چندې په شکل ورته پیسې راټولېږي، تر اوسه ورته ۲ سوه زره افغانۍ راټولې شوې او له خلکو يې هم په دې برخه کې همکاري غوښتې ده.
قومي مشر جاوېد حسیني وايي: « دا خلک چې له خپلو ستونزو، فقر او بېکارۍ سربېره یې یو بل ته لاس ورکړی، ترڅو له پوهنې څخه ملاتړ وکړي، تمه لري چې د بغلان معارف چارواکي هم له دوی ملاتړ وکړي.»
قومي مشر محمد ابراهیم صفر زاده وايي: « د دې ښوونځي ځمکه د خداداد نومي شخص له خوا ورکړل شوې چې شاوخوا ۱۰۰۰ متره مربع ده. دا ښوونځي د ځايي اوسېدونکو له خوا جوړېږي او دا مهال یې ۲۰۰ زره افغانۍ راټولې کړې دي.»
دا ښوونځی چې شپږ ټولګي لري، په معیاري ډول جوړېږي او د شاوخوا ۲۰۰ تنو زده کوونکو د جذب ظرفیت به ولري.
په همدې حال کې د بغلان پوهنې ریاست مسوولین د دې ګام هرکلی کوي او د ښوونځي جوړولو کې د خلکو همکاري مهمه بولي.
د بغلان پوهنې رییس حفیظ الله معتصم باالله وايي: « د ښوونځیو په جوړولو کې د خلکو ونډه اخیستنه ډېر اغېزناک رول لري. موږ کولی شو د خلکو په مرسته او نظریې سره دغه شان ډېر ښوونیز او تعلیمي مرکزونه جوړ کړو.»
بله خوا د سیمې اوسېدونکي وایي، د مناسب ځای نه شتوالي سربېره یې د ماشومانو لپاره ښوونځي سرپناه نه لري او په خبره يې، دغو عواملو د زده کوونکو پر تدریس ناوړه اغېز کړی.
د سیمې اوسېدونکی سید دلبر اصغري وايي: « دا مهال د دې ښوونځي زده کوونکي د جامع جومات په ټولنیزه خونه او دغه راز څو پایې خېمو کې لوست کوي. د دوی ځای ډېر تنګ او نا مناسب دی. دا زده کوونکي د ژمي په سړه هوا کې ډېر په تکلیف وي.»
د سیمې اوسېدونکی علي نظر وايي: « دلته زده کوونکي په آزاده فضا، جوماتونو یا هم خېمو کې لوست کوي. دا ښکاره خبره ده چې په دغو ځایونو کې ښوونه روزنه په سمه توګه نه ترسره کېږي. د خلکو او څارویو رفت آمد زده کوونکو ته مزاحمت جوړوي او د زده کړې بهیر ټکنی کېږي.»
یوازې بغلان نه بلکې د خلکو په خبره د هېواد اکثریت لرې پرتو سیمو کې ښوونځي ودانۍ نه لري او له امله یې ښوونکي او زده کوونکي د زده کړو پرمهال له ګڼو ستونزو سره مخ دي.
