له ايران وروسته روسيې هم دا چمتووالی ښودلی چې د افغانستان او پاکستان ترمنځ د مذاکراتو بيا پيلولو په موخه د منځګړي رول ولوبوي.
خو د روسیې د بهرنيو چارو وزارت په خبره ، مسکو به دې کار ته هغه وخت زړه ښه کړي چې په خپله کابل او اسلاماباد ترې غوښتنه وکړي.
روسیه چې د سیمې او نړۍ په کچه یو زبرځواک هېواد دی، د افغانستان او پاکستان ترمنځ ترینګلتیا ورته د اندېښنې وړ ده او له همدې کبله يې بهرنيو چارو وزارت د خبرو له لارې د اختلافونو پرحلولو ټينګار کړی.
د روسیې بهرنیو چارو وزارت ویانده ماریا زاخارووا: « د غوښتنې په صورت کې روسیه د کابل او اسلاماباد ترمنځ د خبرو منځګړیتوب لپاره چمتو ده. مسکو به د دواړو هېوادونو ترمنځ د سولې په برخه کې خپله همکاري وکړي؛ ځکه د افغانستان او پاکستان ترمنځ د اړیکو ترینګلتیا زموږ او نړیوالې ټولنې لپاره د اندېښنې وړ ده او هر ډول اختلافات باید له سیاسي لارو حل شي.»
دا چې کابل او اسلام اباد د روسیی دې وړاندیز ته څه ځواب ورکوي، لا جوته نه ده؛ خو شنونکي بیا د قطر او ترکیې په منځګړیتوب د شویو درېیو پړاوونو خبرو ناکامۍ ته په اشارې وايي، که د خبرو د بیا پیل امکان موجود وي، نو منځګړي هېوادونه باید پاکستان له غیرمعقوله غوښتنو را وګرځوي، ځکه د دوی په وینا د تېرو مذاکراتو د ناکامۍ یو اصلي سبب هم دا وو.
شنونکي بیا له افغان پلاوي هم غواړي چې د مذاکراتو د تېرو پړاونو په څېر په احتمالي خبرو کې له کره شواهدو او کلک دریځ سره برخه واخلي.
د پوهنتون استاد فیض محمد ځلاند وايي: « دا چې روسیه، چین یا نور هېوادونه د ترکیې او قطر ترڅنګ غواړي او کوښښ کوي چې د پاکستان او افغانستان ترمنځ جوړه وکړي، دا یو ښه ګام دی. موږ ته په کار ده چې د یوه ملي دریځ له مخې له پاکستان سره خپله کشاله حل کړو. موږ له پاکستان سره ګڼې تاریخي ستونزې لرو او ځینې ستونزې پر موږ راتپل شوې هم دي. ځینې داسې ستونزې هم شته چې د پاکستان د منافقانه پرېکړو او پالیسیو له امله رامنځته شوې دي.»
خو ځینې نور افغان شنونکي بیا په دې باور دي چې که پاکستان د افغانستان پر وړاندې خپله پالیسي بدله نه کړي، نو د هېوادونو په منځګړیتوب په بیا بیا خبرې کول کومه نتیجه نه شي لرلی.
د دوی په خبره، اسلاماباد ته په کار ده چې د خپلو کورنیو ستونزو حل په خپله خاوره کې ولټوي او پرنورو دې يې نه تپي.
د سیاسي چارشنونکی شهزاده مسعود وايي: « ترکیې او قطر دا هڅه وکړه او مذاکرات هم ترسره شول، خو متأسفانه پایله یې نه لرله. زما په اند، ښه لاره دا ده چې پاکستان په خپلو پالیسیو کې اساسي بدلون راولي، د یوې متمدنې رابطې لاره خپله کړي او د خپلو کورنیو ستونزو پړه پر افغانستان وا نه چوي. دا مناسبه لاره نه ده او منځنګړي هم څه نه شي کولی.»
قطر او ترکیې د افغانستان پاکستان ترمنځ د شخړو د حل لپاره په تېر اکټوبر کې د درې پړاوه مذاکراتو کوربه توب وکړ، خو خبرو له دې امله پایله نه درلوده چې پاکستان په کې د افغانستان له پلاوي غيرعملي غوښتنې لرلې.
