خوست مېشتو سوداګرو او پانګوالو د یوې ناستې په ترڅ کې له پاکستان سره د سوداګرۍ په برخه کې د اسلامي امارت د وروستۍ پرېکړې هرکلی وکړ. د ناستې ګډونوالو زیاته کړه چې له دې پرېکړې وروسته به له نورو هېوادونو سره د نویو سوداګریزو لارو جوړېدو او کورنیو تولیداتو ودې ته زمینه برابره شي.
سوداګر انور افغان وايي: « له مختلفو هېوادونو سره قراردادونه شوي، اوس که لارې خلاصې شي یا نه شي، په افغانستان به یې اغېز نه وي. بله خبره دا ده چې په دې کې زموږ خیر دی؛ ځکه چې تجاران به وکولی شي نورو لارو ته پاملرنه وکړي او په راتلونکي کې به له داسې ستونزو سره نه مخ کېږو.»
سوداګر نورګل منګل وايي: « موږ ته اوس پخوانۍ تاریخي لارې بېرته جوړې شوې. دا مهال له منځنۍ آسیا سره زموږ ځمکنۍ سوداګري داسې روانه ده چې موږ یې اټکل هم نه شو کولی. هلته زموږ کانټینرونه داسې روان دي لکه خپل هېواد کې.»
د پاکستان له خوا افغانستان سره د سوداګریزو او ټرازیټي لارو سیاسي کول د پاکستان پوځي رژیم هغه تګلاره ده چې غواړي په وسیله یې پر کابل واکمن حکومتونه تر فشار لاندې ونیسي.
د افغانستان سوداګرو او د سوداګرۍ اړوند ادارو ډېر ځله د دې لارو د بدیل غوښتنه کړې.
د خوست سوداګرۍ او پانګونې خونې مسوولان هم د سوداګرۍ د پراختیا لپاره دا یوه مهمه او پرځای پرېکړه بولي.
د خوست سوداګرۍ او پانګونې خونې رییس نواب امیرزی وايي: « دا په تېرو ۵۰ کالو کې لومړی ځل دی چې افغانستان د اقتصادي آزادۍ په لوري یو ګام اخلي. موږ ډېرې زیاتې بدیلې لارې لرو، خلاصه جغرافیه لرو، خو موږ له دې جغرافیې استفاده نه ده کړې؛ اوس به موږ مجبور شوو چې له دې جغرافیې او په کې شته بدیلو لارو ګټه واخلو. دا کار به په داسې ډول کوو چې پر پاکستان خپله اتکا ورو ورو کمه کړو.»
په همدې موخه د یادې ځانګړې ناستې پر مهال، ځایي چارواکو له سوداګرو وغوښتل چې خپلې پانګې په هېواد کې دننه مصرف کړي او پانګوالو ته يې د اسانتیاوو برابرولو ډاډ بیا ځل تازه کړ.
خوست والي عبدالله مختار وايي: « خوست ولایت تر ټولو غوره جغرافیه، ظروف او شرایط لري. موږ د دې ولایت ټولو سوداګرو او پانګوالو ته بلنه وکړې چې دلته راشي او د پانګونې پر مسایلو بحثونه وکړي. موږ کوښښ کوو چې دوی ته امکانات برابر کړو او فرصتونه ورته ایجاد کړو؛ ترڅو دوی خپلو هېوادوالو ته د کار زمینه برابره کړي او پانګونه وکړي.»
خوست کې ځايي چارواکي، پانګوال او سوداګر داسې مهال د سوداګرۍ او پانګونې اړوند مسایلو په تړاو ناسته کوي چې تېره اوونۍ د ریاست الوزرا اقتصادي مرستیال ملا عبدالغني برادر اخوند افغان سوداګرو ته سپارښتنه وکړه چې د پاکستان پرځای د سوداګرۍ لپاره بدیلې لارې وګوري.
ملابرادر خبرداری ورکړ چې که څوک له دې وروسته هم پاکستان سره سوداګري کوي، افغان حکومت یې د ستونزو هوارولو مسوولیت نه اخلي.
