ګڼ شمېر افغان وګړي راټول شوي، د نظام او امنیتي ځواکونو په ملاتړ شعارونه ورکوي.
دوی وايي، افغان ولس د خپلې ځمکنۍ بشپړتیا د دفاع حق لري او په دې برخه کې ټول د خپل حکومت سره اوږه په اوږه ولاړ دي.
د ارشاد، حج او قافو پخوانی وزیر صدیق چکري وايي: « موږ اوس یو ملت یو، که دا امارت دی او که نور افغانان، ټول یو ملت دی. موږ د هر بهرني یرغل په مقابل کې کلک درېږو. موږ هغو سرتېرو ته سلام کوو چې دا مهال د افغانستان سرحدونه ساتي.»
د لاریون ګډونوال سید زمان هاشمي وايي: « سره له دې چې زموږ ملت په بېلو ژبو خبرې کوي، بېل مذهبونه او قومونه دي، خو د بهرني یرغل پر وړاندې یو دريځ لري او غاښ ماتوونکی ځواب ورکوي.»
د پخوانۍ ولسي جرګې غړی محمد اکبري وايي: « موږ د امنیتي ځواکونو له مېړانې قدردانی کوو او ډاډ ورکوو چې موږ په هر ډول حالت کې د دوی ترڅنګ ولاړ یو.»
د لاریون ګډون والو د پاکستان پر ولس او سیاسیونو غږ وکړ چې د دې هېواد د پوځ د بېباکیو مخه ونیسي او پرې نږدي چې د ډیورنډ فرضي کرښې دواړو خواوو افغانانو وینې تویې کړي.
د ارشاد، حج او قاف پخوانی وزیر صدیق چکري وايي: « موږ د پاکستان پرملت، سیاستوالو او علماوو غږ کوو چې نور د ډيورنډ کرښې دواړو غاړو ته د افغانانو وینه تویې نه کړي.»
لاریون کوونکو پرپاکستاني لوري غږ وکړ چې د افغانستان پر وړاندې خپلو سیاستونو او پالیسیو کې باید بدلون راولي او د اوسنۍ پالیسۍ دوام به یې په زیان تمام شي.
د مخکيني حکومت چارواکی شاه عليزی دیدار وايي: « موږ د پاکستان د پوځ له اوسني مشر غواړو د اوسنۍ پالیسي او جګړې پرېږدي او خپله هېواد ته پاملرنه وکړي.»
لاریون کوونکي وايي، د پاکستان نظام او حکومت احسان هېروونکي دي او د افغانانو هغه ستر احسان یې هېر کړی چې پاکستان یې د روسیې له یرغل ژغورلی و؛ همدارنګه پاکستان د افغان کډوالو له برکته اقتصاد وده وکړه او ان تردې چې د اټومي وسلو خاوند شو.
د تاریخ په اوږدو کې افغانانو دا ثابت کړې چې د بهرني یرغل پر وړاندې خپل منځي اختلافات شاته پرېږدي او له یوبل سره څنګ په څنګ درېږي. د پاکستان اوسنیو حرکتونو پر وړاندې به هم افغان ولس یو موټی پاتې شي.
