د ملي دفاع وزارت د ستر درستیز روغتیایي چارو قومندان له شمشاد سره ځانګړې مرکه کې وایي، د سردار محمد داوود خان څلور سوه بستریز روغتون په تېرو څلورو کالو کې د داسې پېچلو او خطرناکو ناروغیو د درملنې او جراحۍ عملیاتو لپاره چمتو شوی چې تر دې وړاندې دلته ناشوني وو.
ډاکټر محمد طاهر احرار وایي، هند، ترکیه او ایران له څلوره سوه بستریز روغتون سره په بېلابېلو برخو کې همکاري کړې او دا همکاري اغېزناکه وه. د ده په وینا، دې روغتیایي مرکز ته روغتیایي اړین درمل او تجهیزات له هند او ترکیې څخه واردیږي.
نوموړی که څه هم د کوم هېواد نوم نه اخلي، خو ظاهرا ً پاکستان ته په اشارې وايي، یاد هېواد په هېڅ وخت کې د افغانستان پرمختګ نه شي زغملی.
د ملي دفاع وزارت د ستر درستیز د روغتیایي چارو قومندان ډاکټر محمد طاهر احرار وايي: « دلته اوس یو خپلواک اسلامي نظام واکمن دی، د فساد مخه نیول شوې او دغه راز د نورو هېوادونو د سیاسي اغراضو مخه نیول شوې. افغانستان په ځینو مهمو برخو کې د ګاونډیانو له خوا فلج شوی، ترڅو په دې برخو کې دوی ته محتاج پاتې شي؛ همدارنګه دا هېوادونو د لارو په برخه کې هم پر اسلامي امارت فشار راوړي، ځکه که لاره بنده شي زموږ ناروغ هېوادوال په سرحد کې کړېږي او دا د دوی لپاره غټه سیاسي حربه ده. د عامې روغتیا، ملي دفاع او کورنیو چار وزارت پر خپلو اړوند روغتونونو سخت کار روان کړی او زه باور لرم چې په یوه کال کې به پر ځان بسیا کېږو. له بده بخته باید ووایم چې ګاونډیانو هېڅکله زموږ خیر نه دی غوښتی او په هېڅ یوه معامله کې افغانستان سره اخلاص نه لري.»
د ملي دفاع وزارت چارواکی وایي، څلوره سوه بستریز روغتون کې ډېری نارغان د سرطان، شکرې، سترګو، پوزې، غوږ او ستوني اړوند ناروغیو له امله مراجعه کوي او د هندوستان په شمول، د ځینو بهرنیو هېوادونو ډکټران یې په ډېر کم لګښت درملنه کوي.
نوموړی زیاتوي، له مالېزیا، بلجیم او نورو بېلابېلو هېوادونو سره خبرې روانې دي او ژر به یوې ښې پایلې ته ورسېږي چې له مخې به یې د یادو هېوادونو ډاکټران دلته راشي او د خلکو درملنه به په کم لګښت ترسره کوي.
ډاکټر محمد طاهر احرار زیاتوي: « دا مهال موږ سره یو ډاکټر د قطر هېواد دی، شاوخوا ۲۰ تنه هم هندي ډاکټران دي؛ هند په طبي زده کړو کې ډېر پرمختللی هېواد دی او ډېرو هېوادونو ته ډاکټران ورکوي. د بلجیم هېواد یو ډاکټر هم موږ سره کار کوي او ټاکل شوې له مالیزیا څخه هم ځینې ډاکټران راشي او په راتلونکي کې پلان لرو چې له مختلفو هېوادونو څخه ډاکټران جذب کړو.»
نوموړی د دې مرکې په یوه برخه کې وایي، څلور سوه بستریز روغتون کې د فساد جرړې ایستل شوې او هېڅوک نه شي کولی په دې ستر روغتیایي مرکز کې په فساد لاس پورې کړي.
د ډاکټر محمد طاهر احرار په خبره، په هېواد کې ګرمه جګړه پای ته رسېدلې او په خبره یې اوس مهال د ټرافیکي پېښو ګراف لوړ دی او له همدې امله څلور سوه بستریز روغتون ته د ټرافیکو پېښو ټپیان او مړي هم ور وړل کېږي.
د ملي دفاع وزارت د ستر درستیز روغتیایي چارو قومندان په دې اړه وايي: « له بده مرغه ټرافیکې حادثات خپل اعظمي حد ته رسېدلي او جدي پاملرنې ته اړتیا لري. موږ ته له دغو حادثو څخه ډېر زیات مړي او ټپیان راوړل کېږي. همدارنګه موږ ته د کونړ له زلزلې څخه هم ډېر وخیم ټپیان راوړل شوي او درملنه یې شوې.»
ډاکټر احرار د خپلو خبرو په دوام دغه راز وايي، ۴۰۰ بستریز روغتون کې به د هند په شمول د ځینو هېوادونو په همکارۍ تر راتلونکو دوو کالو د سرطان په شمول د نورو پېچلو ناروغیو درمنله هم شونې شي.
