فراه کې د بخش اباد بند د اوبو د انحرافي تونلونو رغنيزې چارې ۹۵ سلنه بشپړې شوې دي. د دې پروژې مسوولان وایي، د ۷۵ متره په اوږدوالي د لوی ټونل د کانګرېټ او ۱۰۰ متره په اوږدوالي د کوچني ټونل د شارکرېټ چارې لا پاتې دي. د دوی په خبره، د لوی ټونل رغنيزې چارې به په راتلونکو ۲۰ ورځو کې بشپړې شي.
د فراه بخش اباد بند د سروې څانګې مسوول انجینرعباد وايي: « موږ دا مهال په دوو نقطو کې کار کوو. په لوی ټونل کې د کانکرېټو اچونې برخه ده چې د ۷۵ مترو په اوږدوالي لا پاتې ده او د شلو ورځو په لړ کې به بشپړه شي. همدارنګه په کوچني ټونل کې د شارکرېټ برخه ده چې ۱۰۰ متره اوږدوالی لري او له ټاکلي وخت څخه وړاندې به بشپړه شي. موږ د فراه ولس ته ډاډ ورکوو چې پروژه به له ټاکل شوي وخت وړاندې ګټه اخیستنې ته وسپاروو.»
له بلې خوا، د فراه رود ولسوالۍ مسوولان او خلک هم د یاد بند د رغنیزو چارو چټکتیا او پر وخت د بشپړېدو غوښتنه کوي.
دوي وایي، د وچکالیو له امله دغه ولایت کې د اوبو کچه ټیټه شوې او په دې برخه کې له ګڼو ستونزو سره مخ دي.
د فراه رود ولسوال محمد صادق جهادمل وايي: « غوښتنه مو دا ده چې د دې بند د کارونو په چټکولو کې هڅې وکړي، موږ ډاډ ورکوو چې د ساحې په امنیت کې به هېڅ ډول مشکل پېښ نه شي.»
د فراه اوسېدونکی عبدالغني وايي: « دلته اوبه ډېر ژورې تللې دي، تر ۱۲۰ مترو پورې څاه ګان اوس وچ شوي دي.»
د فراه ځایي مسوولان دغه راز وایي، په دې ولایت کې د زېربنایي او پراختیایي پروژو پلي کولو ته ژمن دي او ټینګار کوي چې د وروستیو وچکالیو له امله د اوبو کمښت په برخه کې د اوسېدونکو ستونزو ته په کتو، اړوند مسوولینو ته سپارښتنه شوې چې باید د بخش اباد بند رغنیزي چارې لا چټکې کړي.
د فراه والي محمد حافظ مجاهد وايي: « موږ له نږدې ولیدل چې کارونه ډېره ښه روان دي، خو بیا هم د شرکت له مسوولینو غوښتنه لرو چې کارونه نور هم چټک کړي. د فراه ولایت د خلکو ستونزې ټولو ته څرګندې دي چې په دې وروستیو کې له وچکالیو سره سخت په تکلیف دي.»
د فراه اطلاعاتو او کلتور رییس عبدالحی سباوون وايي: « د فراه ولایت رهبري او مسوولین وخت په وخت له دې پروژې او بند څخه لیدنه ترسره کوي؛ ځکه چې نظام بخش اباد بند ته لوی اهمیت ورکوي او ولس هم په دې پوهېږي.»
د بخش اباد بند د فراه بالابلوک ولسوالۍ کې پر فراه رود جوړیږي چې ۶۸ زره هکټاره کرنیزې ځمکې خړوبولو او د ۲۷ مېګاواټه برېښنا د تولید ظرفیت لري.
