په هرات ولایت کې د پاسپورټونو کور په کور د رسولو بهیر رسماً پیل شوه.
د مسوولینو په وینا، له کابل وروسته هرات دویم ولایت دی چې په کې د افغان پست دولتي شرکت له لارې غوښتونکو ته پاسپورټونه د هغوی تر استوګنځای رسول کېږي.
د پاسپورټ عمومي رییس عبدالکریم حسیب وايي:« موږ به خپل خدمت ته ادامه ورکوو، دا دی خبره دې ځای ته را ورسېده چې پاسپورټ به کور ته دروړل کېږي. وخت د بچت، پیسې دې نه مصرفېږي، ستړی کېږې نه، خو خدمات درته وړاندې کېږي.»
همدارنګه د افغان پست مسوولین وایي، د کور په کور پاسپورټ رسولو خدمت ترڅنګ تحصیلي او نور مهم اسناد هم له ولایتونو مرکز او له مرکز ولایتونو ته لېږدوي.
دوی وایي، دا لړۍ به په راتلونکو مرحلو کې نورو لویو ولایتونو ته هم وغځول شي.
د افغان پست دولتي شرکت عمومي رییس رحمت الله مکي وايي: « موږ دلته یو داسې پروګرام راوړی چې د ولس د اسانتیا لپاره دی. د دې اسانتیا له مخې به د هر کس پاسپورټ د هغه کور، دوکان، شرکت یا هر ځای چې دی یې غواړي، ور رسول کېږي.»
هرات کې د افغان پست آمر غلام سعید حارث وايي: « دا ډېر ګټور خدمات دي. هغه کسان چې کسب او کار لري یا مامور دی، له دې وروسته اړتیا نه لري چې له ادارې رخصت واخلي او تر لرې ځایونو په پاسپورټ پسې لاړ شي، بلکې اوس کولی شي د ۱۰۰ افغانیو په بدل کې خپل پاسپورټ د کور په دروازه کې ترلاسه کړي.»
په همدې حال کې ځايي چارواکي د پاسپورټ غوښتنلیک ثبتولو او نورو برخو کې د شته ستونزو د حل غوښتنه کوي.
د هرات والي نور احمد اسلام جار وايي: « هرات له مرکز کابل وروسته دویم ولایت دی چې د دې خدماتو لپاره انتخاب شوی او دا یوه ښه پروسه ده. باید د کور آدرسونه او د ټیلفون شمېرې دقیق ولیکل شي، ترڅو دا پروسه نتیجه ورکړي. باید له دې زرین فرصت ښه ګټه واخلو او اجازه ورنه کړو چې افغان پست له خپل پیل کړي کار پښېمانه شي.»
د مسوولینو د ملوماتو له مخې، تېر کال کې هرات کې ۳۲۰ زره پاسپورټونه وېشل شوي، خو اوس د پاسپورټ عمومي ریاست مسوولینو مالومات ښيي چې د پاسپورټ تقاضا کمه شوې او په ټول هېواد کې په ورځني ډول ۳ زره پاسپورټونه وېشل کېږي.
