د قرغې بند چې د هېواد له تفریحي او ښکلو ځایونو ګڼل کېږي، هر کال د بېلابېلو ولایتونو زرګونه سیلانیان د تفرېح، مېلو او د دې سیمې د ښکلو او شنو ځایونو د لیدلو لپاره راځي.
خو په دې تفریحي سیمه او خپله د اوبو بند کې د کثافاتو اچول د سیمې اوسېدونکو او سیلانیانو لپاره یوه جدي ستونزه ګرځېدلې.
د دې ځای یو شمېر اوسېدونکي په دې ځای کې د کثافاتو اچولو په اړه شکایت کوي او وایي، سیلانیان دې له تفرېح او مېلو وروسته هلته د کثافاتو له اچولو ډډه وکړي.
د قرغې اوسېدونکی سجاد وايي: « وطن د مور حیثیت لري او څوک چې دلته راځي، نو د دې ځای له چټلولو دې ډډه وکړي. دا زموږ کور دی او باید پاک یې وساتو.»
د قرغې اوسېدونکی رحمت الله وايي: « زه هیله لرم چې په دې ځای کې کثافات دانۍ کېښودل شي، ترڅو هرڅوک خپل کثافات په کې واچوي.»
د کابل ښاروالۍ د سرسبزۍ کارکوونکي هم په یاده سیمه کې د کثافاتو اچول تاییدوي او له خلکو د دې کار د مخنیوي او ډډه کولو غوښتنه کوي.
د کابل ښاروالۍ د سرسبزۍ کارکوونکی عزیز الله وايي: « ټوله ورځ مو بوجۍ لاس کې ده او پاکاري کوو. دلته خلک راځي، خوراکي توکي اخلي، دېګونه پخوي او کثافات یې همدلته پرېږدي، حتا د خپلو ماشومانو پمپرونه هم دلته اچوي. موږ له دې کارونو سخت په تکلیف یو.»
سیمې ته یو شمېر راغلي خلک هم د ښار پاکوالی د ټولو دنده بولي او په دې برخه کې د کابل ښاروالۍ هڅې ستایي.
قرغې ته په چکر راغلی عبدالمحمد وايي: « دلته ډېره چټلي ده، خلکو کثافات د بند اوبو ته اچولي دي، حتا د لاس وینځلو ځای نه دی پاتې. دا د خلکو لپاره مناسبه نه ده چې خپل کثافات دلته پرېږدي.»
یو بل سیلاني مصطفی وايي: « زه له خلکو غوښتنه کوم چې دلته په تفرېح او سیاحت راځي، نو خپل جنګلي او کثافت دلته وانه چوي بلکې کثافات دانیو کې یې واچوي. دا ډېر بد او ناوړه کار دي.»
د کابل ښاروالۍ مسوولین بیا وایي، په ټول ښار کې د ۵ زرو کثافت دانیو جوړولو لپاره ۷۵ میلیونه افغانۍ ځانګړې شوې او په خبره یې خلک دې ترې ګټه واخلي.
د کابل ښاروالۍ استازی نعمت الله بارکزی وايي: « موږ د سږ کال په پلان کې ۷۵ میلیونه افغانۍ د کثافات دانیو د جوړولو، اخیستلو او لګولو لپاره ځانګړې کړې چې له نېکه مرغه لومړی قرارداد یې د ۳۵ میلیونه افغانیو په لګښت پيل شوی او د ښار په مختلفو ناحیو کې به ۵ زره ۳۸ نیم متر مکعبه ډولې او ۵۰ دانې ۷ مترمکعبه ډولې ولګول شي. د دغو ډولو لګولو کار په دویمه، درېیمه، څلورمه، پنځمه، لسمه، یوولسمه او پنځه لسمه ناحیه کې پيل شوی. دا موضوع په ټولو کابل ښاریانو پورې اړه لري او زموږ غوښتنه دا ده چې خپل کثافات په مشخصو ځایو کې واچوي او په ځانګړې توګه یې د کابل ښار په لښتیو او کانالونو کې وا نه چوي.»
تاریخي او تفریحي سیمو افغانستان ته د نړۍ د یو شمېر سیلانیانو پام را اړولی.
راپورونه ښیي چې یوازې تېر کال نږدې ۲۵۰زره بهرنیو سیلانیانو افغانستان ته سفر کړی او له بېلابېلو تاریخي او تفریحي سیمو یې لیدنه کړې.
