د فراه ولایت شیخ ابونصر فراهي بندر ته غځېدلي سړک چې د رغنیزو چارو له پیل تر اوسه یې نږدې دوه لسیزې تېریږي، لاهم د تېر په څېر ویجاړ پروت دی او تګ راتګ پرې ستونزمن دی.
دا سړک د ایران په مالي ملاتړ جوړېږي، خو تازه هرات کې د ایران سرکونسل د دې سړک د رغنیزو چارو بهیر څخه د لیدنې پرمهال ویلي، پر ایران نړیوال اقتصادي بندیزونه د یاد سړک د چارو پرمختګ پر وړاندې اصلي خنډ دی.
د ده په خبره، بهرنیو بانکونو کې د ایران شتمنیو کنګل او د نورو اسعارو پر وړاندې د ایراني ریال ارزښت کمېدل هم د دې پروژې د اوږدېدو لاملونه جوړ شوي دي.
هرات کې د ایران سرکونسل علیرضا مرحمتي وايي: « د تعمیر او مالي مسایلو په اړه تاسو پوهېږئ چې زموږ هېواد تر بندیزونو لاندې دی، زموږ ډېرې پیسې په بهرنیو بانکونو کې بندې دي. موږ له ځینو بانکونو خپلې پیسې آزادې کړې دي او د وخت په تېرېدو به نورې هم آزادې کړو او بیا به یې د دې سړک د انجینرانو او شرکت په واک کې ورکړو.»
له بلې خوا، د فراه سیمه ییز چارواکي او د قراردادي شرکت مسوولین هم د دې لارې اقتصادي او سوداګریز اهمیت ته په کتو دا لار د افغانستان او ایران ترمنځ د سوداګریزو اړیکو د پراختیا لپاره مهمه بولي او زیاتوي چې اوسمهال یې د اسفالټ چاري پنځوس سلنه بشپړې شوې دي.
د فراه والي غوثالدین رهبر وايي: « دغه لار دواړو هېوادونو ته په اقتصادي او تجارتي لحاظ ډېره مهمه لاره ده؛ ځکه دا لاره د نیمروز او اسلام کلا د لارې پرتله چابهار او بندرعباس ته شاوخوا ۵۰۰ کیلومټره لنډه ده؛ له همدې امله هم موږ او هم دوی ته ډېر ارزښت لري.»
د شیخ ابونصر فراهی سړک د اسفالټ قراردادي شرکت مسوول محمد محمدي وايي: « د هغې پرېکړې له مخې چې د جنوبي خراسان ولایت د مشرتابه له خوا شوې او دغه راز د فراه ولایت مقام، ټولګټو وزارت او پلانېت شرکت اراده هم دا ده چې د دې سړک رغنیز کارونه د روان کال تر پایه بشپړ کړو، ترڅو هم د تجارت او هم د مسافرو لپاره سهولت جوړ شي.»
همدارنګه، یو شمېر سوداګر او د فراه اوسېدونکي د دې سړک له خرابوالي شکایت کوي چې د تګ راتګ پرمهال یې ورته جدي ستونزي جوړې کړې دي.
سوداګر احمد سعید صدیقي وايي: « له صفري نقطې تر فراه ښار پورې هغه سړک چې ټاکل شوې د ایران اسلامي جمهوریت له خوا اسفالټ شي، زه باور لرم چې په فراه ولایت کې به یو صنعتي انقلاب رامنځته شي.»
د فراه یو تن موټر چلوونکی نعمت الله وايي: « زه په دې لین ډېر سخت په تکلیف یم، په میاشت کې یوځل د بارګیرۍ نوبت رارسېږي، د عوارضو لګښت مو تر کرایې ډېر شي. ۲۰ کاله کېږي چې وايي دا سړک نن جوړېږي او سبا جوړېږي؛ با هرڅومره ژر چې کېدای شي، دا سړک جوړ کړي.»
د شیخ ابونصر فراهي یا میل ۷۸ سړک چې شاوخوا ۱۱۸ کیلومټره اوږدوالی لري، په ۱۳۸۶ لمریز کال کې یې چارې د ایران په مالي مرسته پیل شوې، خو له نږدې ۱۸ کلونو تېرېدو سره لاهم نه دي بشپړې شوې.
