د کرېکټ نړیوال ستوري راشد خان له وطني تولیداتو د لیدنې پر مهال د شېدو او مېوې د جوسو تولیدولو له یوې کارخونې لیدنه کړې.
راشد خان د هېواد د اقتصادي پیاوړتیا او ځوانانو ته د کاري فرصتونو برابرولو په موخه دا ډول کارخونې مهمې بولي او په بهر کې له مېشتو افغان پانګه والو غوښتنه کوي چې په افغانستان کې په هغو برخو کې پانګونه وکړي چې اړتیا ورته تر ډېره وي.
نوموړی وایي، د وطني تولیداتو لپاره د نړیوال بازارموندنې هڅه کوي.
خان په دې اړه وايي: « باید ووایم چې زموږ لوبغاړو له دې وړاندې خپل تولیدات خلکو ته نه دي ښودلي او د ټلویزیون له لارې هم نه دي ښودل شوي، دا ځکه چې افغانستان کې هغه کلچر نه و چې خلک خپل تولیدات د لوبغاړو له لارې خلکو ته وښيي او په دې حساب هېوادوال له خپلو تولیداتو نه وو خبر. زما غوښتنه دا ده چې زموږ تولیدات په نړیوال ستندرد جوړ شي او که داسې وشي، خلک او نړۍ به یې ډېر خوښ کړي.»
په ورته مهال، د دې کارخونې مسوولین وایي، د څه باندې ۲۲ میلیونو ډالر پانګونې سره په دې کارخونه کې۳۵۰ کسانو ته د کار زمینه برابره شوې او تولیدات یې اوس مهال تر نړیوال بازار پورې رسېدلي دي.
د کارخونې د چارو د تنظیم مسوول عزیزي وايي: « موږ د دوو کالو په اوږدو کې امریکا، اوزبېکستان، تاجیکستان، قزاقستان او نورو هېوادونو ته د افغانستان تولید قیماق او جوس صادر کړي دي. دلته په رسمي توګه ۳۵۳ تنه له موږ سره پر کار بوخت دي، خو غیر رسمي زرګونو تنو ته رسېږي.»
بله خوا، په دې کارخونه کې کارکوونکي وایي، ورته له برابر شویو کاري فرصتونو خوښ دي او له اسلامي امارت غوښتنه کوي چې په هېواد کې بې دندې ځوانانو ته د کاري فرصتونو په برابرولو کې هڅه وکړي.
د کارخونې کارکوونکی حمدالله صالح وايي: « ډېر خوښ یم چې په خپل هېواد کې راته د کار زمینه برابره شوې، له نورو هېوادونو هم غواړم چې پانګونه وکړي او خلکو ته د کار زمینه برابره کړي.»
د کارخونې کارکوونکی جواد وايي: « خوشاله په دې یم چې د وطن د تولید او د وطن د ویاړ لپاره کار کوم. زه له نورو تجارانو هم غوښتنه کوم چې راشي او پانګونه وکړي، شرکتونه جوړي کړي او زموږ خلک په کې کار وکړي.»
له دې سربېره، راشد خان د کارخونو له مسوولینو غوښتنه کوي چې د تولیداتو کیفیت په نړیوالو معیارونو برابر کړي، ترڅو تولیدات یې وکولی شي په لوړ باور تر نړیوال بازار وړاندې شي.
