د حکومتي ادارو د تېر یوه کال لاسته راوړنو د تشرېح په لړ کې، د سې شنبه پر و رځ د زمري پر ۷ مه د دولتي شرکتونو ریاست چارواکو خپلې کړنې او لاسته راوړنې له رسنیو سره شریکې کړې.
د راپور وړاندې کولو پرمهال د دولتي شرکتو ریاست سرپرست وویل، د زابل د تورې بند ترڅنګ د تورخم ښارګوټي اداري کمپلېکس بشپړ شوی او د غوري او جبل سراج د سېمینټو په کارخونو کې لسګونه زره ټنه سېمنیټ تولید شوي او دغه راز د اسلامي امارت د رهبر د فرمان پر اساس، یو میلیون جریبه ځمکه د قوشتپې کانال په شاوخوا کې دولتي شرکتونو ته لېږدلول شوې ده.
مولوي احمد جان بلال وايي، په ټولیز ډول د دولتي شرکتونو عواید لوړ شوي، خو دا عواید د شرکتونو پرلا پرمختګ او ودې لګول شوي دي.
د بلال په خبره، د ملي پراختیا شرکت په چوکاټ کې د انرژۍ صنعتي کمپلېکس رامنځته شوی چې په کې ښاري بسونه، د توکو د لېږد واګونونه، کرنیزه ماشینري، د صابون تولیدونکي ماشینونه او همداراز د میو وچولولو دستګاوې تولید شوې دي.
بلال په دې اړه وايي: « د انرژۍ مرکز تر عنوان لاندې د صنعتي کمپلېکس رامنځته کېدل. په یاد کمپلېکس کې کرنیز ماشین آلات، ښاري بسونه، د توکو د لېږد واګونونه، د اوبو د بندونو دروازې، د صابون د تولید ماشینونه، د مېوو وچولو دستګاوې او ځینې نور توکي تولید شوي دي.»
په همدې حال کې چارواکي د برېښنا په برخه کې له پرمختګونو خبر ورکوي او وايي، ګڼ شمېر سیمو ته د برېښنا شبکه پراخه شوې او له ۱۳۰ زیاتو ولسوالیو ته د شبکې غځېدو پلانونه چمتو شوي دي.
د دوی په خبره، د برېښنا داخلي تولید زیاتولو لپاره لسګونه میلیارده افغانۍ پانګه راجلب شوې چې ورسره به په کوردننه زرمېګا واټه برېښنا تولید شي.
د برېښنا شرکت اجراییوي رییس عبدالباري عمر وايي: « تقریبا ً ۷۰ میلیارده افغانۍ له داخلي او خارجي شرکتونو له خوا افغانستان ته راوړل کېږي او دلته به د ۱۰۰۰ مېګا واټه برېښنا د تولید ترڅنګ، زرګونه خلکو ته د کار زمینه برابره شي او سلګونه زره کورنیو ته به د برېښنا د تولید شبکه وغځول شي.»
د دولتي شرکتونو ریاست سرپرست مولوي احمد جان بلال وايي: « د ۱۴۴۶ هجري قمري کال په اوږدو کې د برېښنا شرکت د داخلي تولید د زیاتولو په موخه، له پانګوالو سره د ۶۱۹ مېګاواټه برېښنا چې شاوخوا ۵۹۱.۶ میلیونه ډالرو ارزښت لري، قراردادونه لاسلیک شوي او چارې یې جریان لري. د روان کال په لړ کې به په مجموعي توګه تر ۱۰۰۰ مېګا واټو پورې د برېښنا د داخلي تولید پروژې عملا ً پیل شي.»
همدا راز، د دولتي شرکتونو چارواکي زیاتوي، په تېر کال کې ۳ میلیونه ټنه نفتي توکي وارد شوي.
دوی وايي، اوس مهال په کور دننه د نفتي مواد تولید په ورځني ډول تر۷۰۰ ټنو دی او هڅې روانې دي چې دغه کچه نورهم لوړه شي.
د نفتو او ګازو شرکت رییس محمد نصیر رحیمي وايي: « په کلني ډول تقریبا ً ۳.۵ میلیون ټنه د نفتي توکو واردات لرو. زموږ داخلي تولید تقریبا ً په ورځ کې له ۶۰۰ تر ۷۰۰ ټنو دی او د زیاتولو لپاره یې کار روان دی او کېدای شي په نږدې راتلونکي کې زیات شي؛ ځکه چې نوي څاه ګان کیندل شوي دي.»
د دولتي شرکتونو ریاست سرپرست بیا وايي، په دې برخه کې تر ۲۲ میلیارده افغانیو پانګه جذب شوې چې د هوکړه شویو پروژو په تطبیق سره به د دغو شرکتونو عواید له ۳۰ میلیارد افغانیو واوړي.
د دولتي شرکتونو ریاست سرپرست مولوي احمد جان بلال په دې اړه وايي: « د تېر کال په جریان کې د امارتي شرکتونو د لوی ریاست له لوري د برېښنا د تولید، د معدونو د استخراج او پلورلو، مختلفو خدمتونو، د تېلو د پمپونو او مازادو جایداتونو په برخه کې د مختلفو شرکتونو ۲۳ مشارکتي قراردادونه او طرحې منظورې شوې چې پر بنسټ یې خصوصي سکټور شاوخوا ۲۲ میلیارده افغانۍ پانګونه کوي. د دې پانګونې په نتیجه کې به امارتي شرکتونه په راتلونکې کمه موده کې شاوخوا ۳۲ میلیارده افغانیو پورې عواید ولري.»
د دولتي شرکتونو چارواکي دغه راز وايي، د ښاري اوبو رسولو او فاضلابو ریاست له لارې یې ګڼ شمېر سیمو ته لسګونه کیلومټره د اوبو شبکه رسولې او ګڼ شمېر نورې پروژې ترکار لاندې دي.
د چارواکو په خبره، د قوشتپې کانال د لومړي فاز چارې ۹۸ سلنه بشپړې شوې، د پلونو او سربند چارې هم بشپړېدو ته نږدې شوې او دغه راز د دې کانال د دویم فاز چارې ۹۰ سلنه بشپړې شوې او په بنسټيزو چارو یې کار روان دی چې تر اوسه ۴۰ سلنه پرمختګ لري.
