د ایران بهرنیو چارو وزارت ویاند په خپل وروستي خبري کنفرانس کې د سرپرست حکومت د رسمیت پېژندنې په تړاو د خپل هېواد وروستی دریځ اعلان کړ.
اسماعیل بقايي په دې اړه د روسیې وروستي اقدام ته په اشارې ویلي، هېوادونه د خپلو ملي ګټو پر اساس خپلمنځي اړیکې ساتي او ایران هم همدې ګټو ته په کتو په دې برخه کې دریځ نیونه کوي.
نوموړي په راتلونکي کې دې احتمال ته د یوې پوښتنې په ځواب کې له افغانستان سره د هر اړخیزو اړیکو پر دوام ټینګار کړی او زيات کړې يې ده چې ايران د رسمیت پېژندنې په تړاو خپله وروستۍ پرېکړه د وضعیت له بشپړې ارزونې وروسته اعلانوي.
بقايي په دې اړه وايي: « د رسمیت پېژندنې د موضوع په اړه باید ووایم. هو! ځینو هېوادونو دا کار کړی، خو د رسمیت پېژندلو موضوع یوه حاکمیتي پرېکړه ده او هېوادونو خپلو مصالحو او منافعو ته په کتو پرېکړه کوي او موږ دغو پرېکړو ته احترام لرو. موږ له افغانستان سره په ګڼو برخو کې زیات تماسونه او مراودات لرو او هوډ لرو چې دغو ګټورو اړیکو ته ادامه ورکړو. د رسمیت پېژندلو په اړه هم هرکله چې موږ په دې اړه یوې پایلې ته ورسېږو، اعلان به وکړو.»
بقايي دغه راز افغانستان ته د ایران د ولسمشر مسعود پزشکیان د سفر په تړاو د رسنیو وروستي راپورونه ناسم بللي او وايي، دا خبر دقیق نه دی را اخیستل شوی.
نوموړي ویلي، تر دې دمه دوی ته په دې اړه څه نه دي ویل شوي او نه هم دامهال پزشکيان کابل ته د سفر خاص پلان لري.
د ایران بهرنیو چارو وزارت ویاند زیاته کړې: « هغه څه چې په دې اړه رسنیو کې راغلي، شاید په کره توګه یې انعکاس نه وي موندلی. اوس مهال افغانستان ته د ښاغلي ولسمشر د سفر په اړه موږ ته څه نه دي ویل شوي؛ هغه څه چې مطرح شول د ایران اسلامي جمهوریت د علاقې او لېوالتیا څرګندونه او له افغانستان سره پر ښو اړیکو او ښه ګاونډيتوب ټینګار و.»
د سیاسي چارو شنونکي له امریکا او په سیمه کې له هېوادونو سره د ایران ناسمو روابطو ته په کتو اټکل کوي چې ایران د خپل سیاسي ملاتړ ډېرولو او له غربي نړۍ سره په اړیکو کې د رامنځته شوي درځ ډکولو له امله په افغانستان کې له اوسني حکومت سره تعامل ته اړ دی.
د دې لامل ترڅنګ، له افغانستانه د ورتلونکو اوبو او د سوداګریزې راکړه ورکړې او له امریکا سره د سیالۍ لپاره هم ښايي ایران ډېر ژر د اسلامي امارت رسمیت پېژندنه اعلان کړي.
د سیاسي چارو شنونکی معینګل څمکنی وايي: « ایران ناچار دی او له روسیې وروسته به د ګاونډیو په قطار کې خامخا افغانستان پررسمیت پېژني، ځکه ورځ تر بلې پر ایران د نړۍ کړۍ راتنګېږي. پر ایران د اسراییلو له برید وروسته، ایران سخت کمزوری شو او ویې ښودله چې د ایران هوايي حریم ډېر ژر د اسراییلو لاس ته ورغی.»
له دې هر څه سره، د ایران بهرنیو چارو وزارت داسې مهال افغانستان ته د دې هېواد د ولسمشر د راتګ په تړاو د بې خبري اعلان کوي چې تر دې درې ورځې وړاندې د روانې جولای میاشتې په ۲۶مه یې افغانستان ته د خپل سفر په تړاو د چمتووالي خبر ورکړی و.
نوموړي د بهرنیو چارو وزارت له اړونده رییسانو او مدیرانو سره په ځانګړې ناسته کې ویلي و چې غواړي له خپلو ګاونډیو په تېره بیا له افغانستان سره خپلو اړیکو ته وده ورکړي.
