د ایران د بشري حقونو سازمان(ههنګاو) راپور ورکړی چې د یوې ۲۵ کلنې افغان مېرمنې او د هغې د درېیو کوچنیو ماشومانو جسدونه د ایران پلازمېنې تهران په مرتضی ګرد سیمه کې موندل شوي دي.
راپور کې ویل شوې، د دې مېرمنې ماشومان د ۲ ، ۳ او ۵ کالو عمر لرونکي وو او د وژل شوې مېرمنې افغان تبعه خاوند د پېښې پر مهال ایران کې حضور نه درلود.
د راپور یوه برخه:« یوه ځوانه مېرمن چې د افغانستان تابعیت لري، له خپلو درېيو کوچنیو ماشومانو سره په خپل کې کور کې چې په تهران کې موقعیت لري، د سړې سلاح او زندۍ کولو له لارې په قتل رسېدلي. د دې ځوانې مېرمنې او ماشومانو جسدونه له قتل ۱۰ ورځې وروسته پیدا شوي دي.»
د رکنا په نوم رسنۍ هم چې د ایران له امنیتي نهادونو سره نیمه رسمي همکاري لري، د دې پېښې پخلی کړی.
رکنا رسنۍ ویلي: « د دې کورنۍ د غړیو جسدونو راپور د ګاونډویانو له خوا وروسته له هغې ورکړل شوی چې بد بوی یې له کوره خپور شوی. په قتل رسېدلي افغانان په یوه کرایي کور کې اوسېدل.»
د دې پېښې په تړاو په ایران کې د افغان کډوالو ترمنځ په داسې حال کې اندېښنې زیاتې کړې چې څه موده وړاندې د ۳۲ کلنې کبرا جسد هم له ۵۰ ورځو لادرکۍ وروسته ټوټه ټوټه په کثافاتو کې وموندل شو.
دې ته ورته یوه بله پېښه کې د ۱۸ کلنې طاها رضایي جسد هم چې د ایران په یوه باغ کې په قتل رسېدلې وه، موندل شوی و.
د راپورونو پربنسټ، یو شمېر افغان کډوال د شکجنو، ربړونې او وهلو له امله په قتل رسېدلي او یا هم پرته له کوم روښانه دلیل او د قضيې څېړلو د شفافې پروسې نه شتون له امله، په اعدام محکوم شوي دي.
په ورته مهال، د کډوالو د حقونو مدافعین په ایران کې د افغان کډوالو روان وضعیت انساني او اخلاقي ناورین بولي او زیاتوي چې دا کار په دې مانا دی چې هلته په ایران کې هېڅ کډوال انساني ارزښت نه لري.
د کډوالو د حقونو مدافع ګلاخان بهادري وايي: « که افغانان په مشکوکو شرایطو کې وژل کېږي دا پېښې روښانه رسنیز پوښښ او قانوني تعقیب ونه لري، مانا یې دا ده چې ایران کې د افغان مهاجر ژوند هېڅ ارزښت نه لري. دا یوه اخلاقي، ټولنیزه او قانوني فاجعه ده. هلته افغان مهاجرین هره ورځ له توهین، سپکاوي او غیر انساني چلن سره مخ دي.»
د سیاسي چارو شنونکي بیا د دې پېښو او وضعیت دوام د دواوړ هېوادونو ترمنځ شته اړیکو پر زیان بولي او له ایراني چارواکو د دې ډول ناورینونو د مخنیوي غوښتنه کوي.
د سیاسي چارو شنونکی نجیب الرحمن شمال وايي: « هغه کډوال چې په ایران کې ژوند کوي، له بده مرغه تل د ایران د اسلامي حکومت له خوا اعدامېږي، ځنځیري او هدفي وژنې هر وخت افغان مهاجرین ګواښي او دا د کورنیو پر روان او دغه راز د دواړو هېوادونو پر اړیکو ډېر منفي اغېز لري. زه هیله لرم چې ایراني چارواکي افغان کورنیو ته د لا ډېرو زیانونو اړولو د مخنیوي لپاره اړین ګامونه پورته کړي.»
د دې راپور تر خپرېدو پورې مو هڅه وکړه چې د موضوع په تړاو د سرپرست حکومت د بهرنیو چارو وزارت نظر هم ولرو، خو زموږ پرله پسې اړیکو ته یې ځواب رانه کړ.
په تهران کې د افغانې مېرمنې او د هغې درېیو ماشومان وژنه یوه ترخه جنایي پېښه ده؛ دا د هغو قتلونو، وهلو، ټکولو او بې عدالتیو ځنځیر یوه کړۍ ده چې له کلونو راهیسې یې افغان کډوال په ایران کې تجربه کوي.
له دې سره، دا پوښتنه بې ځوابه پاتې کېږي چې آیا دغه قتل هم د نورو قضیو په څېر بې پلټنې پاتې کېږي که نه دا ځل به یې په اړه جدي ځواب غوښتل کېږي؟
